Bakıda Türk Dövlətləri Təşkilatının (TDT) daxili işlər nazirlərinin ikinci görüşü keçirilib.

"Sizinxeber.az" xəbər verir ki, görüşdə Azərbaycanın daxili işlər naziri general-polkovnik Vilayət Eyvazov, Qazaxıstanın daxili işlər naziri Erjan Sadenov, Qırğızıstanın daxili işlər naziri Ulan Niyazbekov, Türkiyənin daxili işlər naziri Ali Yerlikaya, Özbəkistanın daxili işlər naziri Aziz Taşpulatov, Şimali Kipr Türk Cümhuriyyətinin daxili işlər naziri Dursun Oğuz, Macarıstan daxili işlər nazirinin müavini Bentse Retvari və TDT-nin Baş katibi Kubanıçbek Ömüralıyev iştirak edib.

V.Eyvazov quruma üzv dövlətlərin xalqlarını sıx dostluq, qarşılıqlı inam və hörmət tellərinin bağladığını, türk dövlətləri liderlərinin müdrik uzaqgörənliyi və siyasi iradəsi sayəsində ölkələrarası dostluq və qardaşlıq münasibətlərinin keyfiyyətcə yeni mərhələyə qədəm qoyduğunu, strateji tərəfdaşlıq xarakteri daşıdığını, dövlət başçılarının müəyyənləşdirdiyi strategiyaya uyğun olaraq dinamik inkişaf etdiyini, bu kontekstdə Daxili İşlər nazirlikləri arasındakı əməkdaşlığın daha da dərinləşdiyini diqqətə çatdırıb.

İclasda TDT-yə üzv ölkələrin Daxili İşlər nazirlikləri arasında əməkdaşlığın genişləndirilməsi və dərinləşdirilməsi, transmilli mütəşəkkil cinayətkarlıqla birgə mübarizə, narkotik vasitələrin, psixotrop maddələrin və prekursorların qanunsuz dövriyyəsi sahəsində məlumat mübadiləsi, informasiya texnologiyalarından istifadə edilməklə törədilən cinayətlərin qarşısının alınması, aşkar edilməsi, açılması üzrə əlaqəli fəaliyyət və Təşkilatın daxili işlər orqanlarının rəqəmsallaşması sahəsində əməkdaşlığın perspektivləri kimi məsələlər müzakirə edilib.

TDT-yə üzv dövlətlərin daxili işlər nazirlərinin növbəti görüşünün Qazaxıstanda keçirilməsi qərara alınıb.

Tədbirdə tərəflər TDT daxili işlər nazirlərinin ikinci görüşünə dair Birgə Kommünike sənədini imzalayıblar.

Çıxışlarda təşkilata üzv və müşahidəçi dövlətlərin daxili işlər nazirlərinin ikinci görüşünün türk xalqları və dövlətləri arasında həmrəyliyin möhkəmləndirilməsinə növbəti təkan olacağına əminlik ifadə olunub, habelə Azərbaycan Daxili İşlər Nazirliyinin tədbirə ev sahibliyi etməsinə görə təşəkkür edilib.

Oxşar xəbərlər

TDT daxili işlər nazirlərinin görüşü keçirilib

Gələn il Azərbaycanda TDT ölkələrinin daxili işlər nazirlərinin ikinci iclası keçiriləcək

Özbəkistanda daxili işlər naziri vəzifəsinə yeni təyinat olub

Daxili işlər naziri sıra baxışı keçirib

Daxili işlər naziri Şəkidə vətəndaşları qəbul edəcək