Peter Siyarto: Dünya dəyişikliklər Türk Dövlətləri Təşkilatının əhəmiyyətini artırıb

Əgər türk dövlətləri olmasaydı, bu gün Macarıstanın enerji təchizatının təhlükəsizliyi mümkünsüz idi.

“Report”un Budapeştə ezam olunmuş əməkdaşı xəbər verir ki, bu barədə Macarıstanın xarici işlər naziri Peter Siyarto Türk Dövlətləri Təşkilatının (TDT) Baş katibi Kubanıçbek Ömüraliyevlə birgə mətbuat konfransında danışıb.

Onun sözlərinə görə, Macarıstan türk dövlətləri ilə əməkdaşlıqdan böyük fayda əldə edib:

“İqtisadiyyat, təhlüksizlik və enerji təchizatı bizim türk dövlətləri ilə əməkdaşlıq gündəliyimizdə dayanan əsas məsələlərdir. Dünya xeyli dəyişib və bu dəyişikliklər TDT-nin əhəmiyyətini artırıb. Həmçinin bizim türk dövlətləri ilə uğurlu əməkdaşlığımızın da əhəmiyyəti artıb. Bu gün təhlükələr dövründə yaşadığımızı demək heç də mübaliğə deyil”.

XİN başçısı vurğulayıb ki, Avropa ciddi çağırışlarla üz-üzədir:

“Biz macarlar türk dövlətləri ilə əməkdaşlıqdan son illərdə çox şey qazandıq və bu əməkdaşlıq sayəsində Avropanı hazırda sarsıdan çağırışlara cavabları daha asan tapa bilirik. Qlobal iqtisadi çağırışlara baxmayaraq, türk dövlətləri iqtisadi cəhətdən gücləniblər. Son illərdə bu ölkələrin ÜDM-i 20 faiz, təşkilat üzvləri arasında ticarət dövriyyəsi isə 50 faiz artıb. Biz də bu prosesdə iştirak etmişik, türk dövlətləri ilə ticarət dövriyyəmizi ikiqat artırmışıq”.