Layihə rəhbəri: Ermənistanda Qərbi Azərbaycan irsini lentə alan xarici fotoqrafların işinə maneə yaradılıb

Son altı ay ərzində Qərbi Azərbaycan ərazisində fəaliyyətə cəlb olunan xarici fotoqraflar oradakı dağılmış evləri, abidələri, qəbirləri, sındırılmış baş daşlarını və kitabələri lentə alıblar.

"Sizinxeber.az" xəbər verir ki, bunu "İrs" jurnalının baş redaktoru, layihə rəhbəri Musa Mərcanlı "Daşlar sükut içində danışır: Azərbaycan irsinin qorunması" adlı elmi-praktik tədbir çərçivəsində jurnalistlərə açıqlamasında deyib.

Onun sözlərinə görə, Ermənistanda vaxtilə azərbaycanlıların yaşadığı Qərbi Azərbaycan ərazisində fəaliyyətə cəlb olunan xarici fotoqraflara iş prosesində maneələr yaradılıb:

"Biz bir neçə dəfə həmin ərazilərə xarici fotoqrafları göndərsək də, ermənilər onlara işləməyə imkan vermirdilər. Həmin bölgədəki bəzi kəndlərdə yaşayan yezidi kürdlər də əcnəbi fotoqrafları o ərazilərə yaxın buraxmırdılar.

Lakin bu çətinliklərə baxmayaraq, Qərbi Azərbaycan irsinin əks olunduğu fotolar əldə edilib və o təsvirlər bu gün təqdimatı keçiriləcəık "Daşları toplamaq vaxtıdır" adlı fundamental nəşrdə yer alıb".