Azərbaycan ərazilərinin işğaldan azad olunması itkin düşənlər haqqında məlumat alınacağına ümidləri artırıb.

Bunu “Sizinxeber.az”un azad olunmuş ərazilərə ezam edilmiş əməkdaşına açıqlamasında ermənilərin Xocalı Soyqırımını törətdiyi zaman şəhər sakinlərini xilas edərkən itkin düşmüş Xəqani Aslanovun oğlu Murtuz Aslanov deyib.

Onun sözlərinə görə, atası soyqırımına məruz qalan Xocalı sakinlərinin xilas olunmasında fədakarlıq göstərib:

“Əslimiz Ağdamın Şelli kəndindəndir. Atam hərbçi idi, 1992-ci ildə ermənilərin törətdiyi soyqırımı zamanı Xocalının bir çox sakinlərinin xilas edilməsində fədakarlıq göstərib. Xocalı sakinlərindən bəzilərini evimizə gətirmişdi. Atam o ağır günlərdə rahatlıq tapmırdı, köməksiz əhaliyə yardım etmək üçün yenə geri qayıdırdı. Evdən çıxanda anamı və nənəmi çağıraraq “Hər şeyə və hər xəbərə hazır olun. Mən şəhid ola, yaxud da əsir düşə bilərəm. Övladlarımdan muğayat olun”, - deyirdi.

M.Aslanov atasının bir gün itkin düşəcəyini, onun taleyi barəsində məlumatsız olacaqlarını o zaman təsəvvür belə etmədiklərini vurğulayıb:

“Atamın bu sözlərini ciddi qəbul etmirdik. Yaşım az olsa da, onun qayıtmayacağı haqda dediklərini çox düşünürdüm. Ağlımıza da gəlməzdi ki, atamın ehtiyat üçün dediyi sözlər gerçəkləşə bilər. Atam itkin düşdüyü gündən etibarən, qarşılaşdığımız Xocalı sakinlərindən onu soraqlasaq da, heç bir xəbər ala bilmirik”.

O əlavə edib ki, Azərbaycan əraziləri işğaldan azad olunduqdan sonra atasının taleyindən xəbər alacaqlarına ümidləri artıb:

“Biz ilk olaraq Ağdam Şəhidlər Xiyabanını ziyarət etdik. Orada dağıdılan qəbirləri gördükcə, hiddətim daha da çoxaldı. Ancaq torpaqlarımızın işğaldan azad olunması atam haqqında məlumat almaq ümidimizi yenidən artırıb”.

Oxşar xəbərlər

Şuşada itkin düşən şəxsin qızı: Ən böyük arzum üzünü görmədiyim atamın taleyindən xəbər almaqdır

Xocalı soyqırımı zamanı itkin düşənlərin sayı 196 nəfərə çatıb, 200-ü keçəcək

Xocalıda itkin düşmüş şəxslərə aid ehtimal edilən məzar yerlərində qazıntı və ekshumasiya işləri aparılacaq - RƏSMİ

Azərbaycanlı əsirlər işgəncələrə məruz qoyulub - Eldar Səmədov

Taleyi müəyyən edilmiş şəhidlərin dəfni nə vaxt olacaq?