Pərviz Şahbazov: “Enerji keçidinə birtərəfli yanaşma ciddi risklər yarada bilər”

Enerji keçidinə birtərəfli yanaşma ciddi risklər yarada bilər.

“Report” xəbər verir ki, bunu Azərbaycanın energetika naziri Pərviz Şahbazov Bakıda keçirilən 30-cu Yubiley Beynəlxalq Xəzər Neft və Qaz sərgisi və 13-cü Xəzər Beynəlxalq Energetika və Yaşıl Enerji beynəlxalq sərgisi çərçivəsində “Dayanıqlı və davamlı enerji gələcəyi naminə qlobal əməkdaşlıq” panel müzakirəsində bildirib.

Onun sözlərinə görə, son bir neçə il göstərib ki, enerji təhlükəsizliyini artıq əvvəlki kimi qəbul etmək olmaz: "Neft və qazın etibarlı təchizatını təmin etmək həyati əhəmiyyət daşımağa davam edir. Karbohidrogenləri tamamilə aradan qaldırmağa çalışan model bu mərhələdə qeyri-realistikdir və enerji keçidinə birtərəfli yanaşma ciddi risklər yarada bilər. Son 30 il ərzində ilkin enerji istifadəsində karbohidrogenlərin qlobal payı yalnız cüzi şəkildə, yəni cəmi 5 % dəyişib. Bu gün karbohidrogenlər hələ də ABŞ-də ilkin enerji istehlakının 80 %-dən çoxunu, Çində təxminən 90 %-ni və Avropa İttifaqında 70 %-ni təşkil edir. Bu göstərir ki, alternativ enerji mənbələri ənənəvi olanları əvəz etmir — onları tamamlayır".

Nazir vurğulayıb ki, buna görə də, neft və qazın qlobal enerji balansında davam edən mərkəzi rolunu və bunun gələcək illər ərzində belə qalacağı ehtimalını nəzərə alaraq, bu sektora maliyyələşdirmənin vaxtında olması və gecikdirilməməsi vacibdir: "Enerji mənbələrinin, resursların, ticarət yollarının və təchizat zəncirlərinin diversifikasiyası davamlı enerji təhlükəsizliyini təmin etmək üçün əsas prioritet olaraq qalmalıdır".