Urbanizasiya insanların kimliyinin, dini dəyərlərinin, tarixi və mədəni irsinin qorunması ilə paralel şəkildə həyata keçirilməlidir.

"Sizinxeber.az" xəbər verir ki, bunu Bakı Beynəlxalq Multikulturalizm Mərkəzinin icraçı direktoru Rəvan Həsənov Ümumdünya Şəhərsalma Forumunun 13-cü Sessiyası (WUF13) çərçivəsində keçirilən "Yerli xalqların hüquqları üzrə dəyirmi masa"da çıxışında deyib.

Onun sözlərinə görə, müasir dövrdə şəhərlərin yalnız texnoloji və memarlıq deyil, eyni zamanda, sosial və mədəni baxımdan da inklüziv şəkildə formalaşdırılması vacibdir:

"Urbanizasiya insanların kimliyinin, dini dəyərlərinin, tarixi və mədəni irsinin qorunması ilə paralel həyata keçirilməlidir. Yerli xalqların hüquqlarının qorunması bu gün beynəlxalq ictimaiyyət qarşısında duran ən mühüm məsələlərdən biridir. Yerli xalqlar bəşəriyyətin mədəni yaddaşının, tarixi irsinin daşıyıcılarıdır. Bu baxımdan onların hüquqlarının qorunması yalnız hüquqi və siyasi məsələ deyil, həm də mənəvi və humanitar məsuliyyətdir".

İcraçı direktor Azərbaycanın şəhərsalma siyasətində inklüzivlik prinsipinə verilən önəmi də diqqətə çatdırıb:

"Həm Bakı şəhərində, həm də digər regionlarda həyata keçirilən layihələr zamanı müxtəlif etnik icmaların mədəniyyəti və dini inancları nəzərə alınır, tarixi və dini abidələrin qorunmasına xüsusi həssaslıqla yanaşılır. Tarixi və dini abidələrin bərpası, mədəni irsin qorunması və müxtəlif inanc sahiblərinin özlərini təhlükəsiz və rahat hiss edə biləcəkləri sosial mühitin formalaşdırılması Azərbaycanın şəhərsalma siyasətinin ayrılmaz hissəsidir".

R.Həsənov həmçinin bildirib ki, urbanizasiya prosesləri heç bir halda yerli xalqların və etnik icmaların öz kimliyini, dilini və mədəni yaddaşını itirməsinə səbəb olmamalıdır:

"Əksinə, şəhərlər müxtəlif etnik və dini icmaların özlərini təhlükəsiz və bərabərhüquqlu hiss etdikləri inklüziv məkana çevrilməlidir. Azərbaycanın həyata keçirdiyi layihələr də məhz bu prinsiplərə əsaslanır, müxtəlif etnik icmaların, fərqli dinlərin və mədəniyyətlərin nümayəndələrinin harmonik birgəyaşayışını təşviq edir. İnklüziv şəhər inkişafı yalnız qarşılıqlı hörmət, sosial ədalət və mədəni müxtəlifliyə verilən dəyər əsasında mümkün ola bilər".

Oxşar xəbərlər

İcraçı direktor: Azad edilmiş ərazilərdə şəhərsalma yanaşmaları multikultural dəyərlərlə birləşdirilir

Nazir müavini: Münaqişələr zamanı mədəni irs ən çox zərər görən sahələrdən olub

Rəvan Həsənov: Qarabağda şəhərlər müasirlik və müxtəlifliyi birləşdirərək yenidən qurulur

"Gəmiqaya və Göygöl Tarixi-Mədəni və Təbii Kompleksi" Dünya İrsinin ilkin siyahısına daxil edilib

Səbinə Salmanova: Şəhərsalma məsələsi yalnız tikinti və infrastruktur anlayışı ilə məhdudlaşmır