"İnternet qadağası götürülsün, həbs edilənlərin işinə ədalətlə baxılsın" - Pezeşkiandan ÇAĞIRIŞ

İran Prezidenti Məsud Pezeşkian 11 günlük bloklanmadan sonra ölkədə internet bağlantısına qoyulan məhdudiyyətlərin aradan qaldırılmasına çağırış edib.

Oxu.Az xəbər verir ki, bu barədə EFE məlumat yayıb.

"Onlayn ticarətin asanlaşdırılmasına və rabitə məhdudiyyətlərinin azaldılmasına ehtiyac var. Mən Ali Milli Təhlükəsizlik Şurasının katibi Əli Laricaniyə məhdudiyyətləri mümkün qədər tez aradan qaldırmağı tövsiyə etmişəm", - deyə İran prezidenti bildirib.

O, həmçinin etirazlar zamanı saxlanılan şəxslərin işlərinə diqqətlə baxılmasının vacibliyini də önə çəkib: "Məlum hadisələrlə əlaqədar saxlanılan insanların işlərinə baxılarkən son dərəcə hərtərəfli və ədalətli olmaq lazımdır".

Məlumata görə, yanvarın 8-dən İranda internet xidməti faktiki olaraq iflic vəziyyətindədir.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, nümayişçilər paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.