Dövlət Turizm Agentliyi yanında Azərbaycan Turizm Bürosu 18-20 sentyabrda Qazaxıstanın Astana və Almatı şəhərlərində keçirilmiş “Luxury Travel Mart” tədbiri çərçivəsində ölkəmizin lüks turizm məhsullarının təqdimatı ilə çıxış edib.

"Report" xəbər verir ki, bu barədə agentlik məlumat yayıb.

Əsasən lüks turizm məhsullarının təqdim olunduğu tədbirdə Qazaxıstanın 25 aparıcı turizm operatoru və səyahət agentliyi ilə B2B (biznesdən-biznesə) formatlı görüşlər keçirilib, Azərbaycanın turizm potensialı, o cümlədən xizək kurortları, Bakı şəhər turları, sağlamlıq və termal istirahət mərkəzləri, eləcə də işgüzar və lüks turizm məhsulları haqqında məlumat verilib.

Turizm sahəsində əməkdaşlıq əlaqələrini möhkəmləndirmək və yeni işgüzar əlaqələr qurmaq üçün əlverişli platforma olan “Luxury Travel Mart” tədbiri çərçivəsində təşkil edilən biznes səhər yeməyində Qazaxıstanı təmsil edən 50 turizm agentliyi üçün Azərbaycanın əsas turizm destinasiyaları barədə təqdimat keçirilib.
İştirakçılar ölkəmizin qış idman növləri, mədəni turizm, sağlamlıq təklifləri və turizm təcrübələri barədə məlumatlandırılıblar.

Bu ilin yanvar-avqust aylarında Qazaxıstandan Azərbaycana 58 082 nəfər səfər edib ki, bu da ötən ilin eyni dövrü ilə müqayisədə 64 % çoxdur.

Oxşar xəbərlər

Azərbaycan və Qazaxıstanın turizm assosiasiyaları arasında Əməkdaşlıq Memorandumu imzalanıb

Azərbaycan və Albaniya turizm sahəsində əməkdaşlıq istiqamətlərini müəyyən ediblər

Azərbaycan Özbəkistanda keçiriləcək Beynəlxalq Turizm Sərgisinə qatılacaq

Azərbaycan Hindistanda keçiriləcək beynəlxalq turizm sərgisinə qatılacaq

"Şahdağ Turizm Mərkəzi" sığortaçı seçib