Urbisid konsepsiyası dünya miqyasında silahlı münaqişələrin sayının artması və şəhər mühitinin dağıdılması fonunda getdikcə daha aktual olur.

"Sizinxeber.az" xəbər verir ki, bunu Bakıda keçirilən WUF13-də London İqtisadiyyat Məktəbinin (LSE) dəvət olunmuş elmi əməkdaşı Din Şarp bəyan edib.

Onun sözlərinə görə, urbisid anlayışı zorakılığın daha geniş kateqoriyaları, o cümlədən genosid və ekosidlə sıx bağlıdır və müharibə şəraitində şəhər mühitinin qəsdən dağıdılmasını əks etdirir.

"Urbisidi cinayətlərin cinayəti kimi nəhəng mənəvi ağırlıq daşıyan genosid anlayışına müraciət etmədən müzakirə etmək mümkün deyil", - Şarp qeyd edib.

O vurğulayıb ki, bu termin ekosid anlayışı ilə təxminən eyni vaxtda meydana gəlib, lakin geniş akademik tanınmanı xeyli gec - yalnız 2000-ci illərin əvvəllərində əldə edib.

Tədqiqatçının sözlərinə görə, bu, şəhərlərin müharibə və müdafiə ilə tarixi əlaqələrinə baxmayaraq, uzun müddət davamlı strukturlar kimi qəbul edilməsi ilə bağlıdır.

"Tarixən şəhərlər müdafiə divarları da daxil olmaqla möhkəmləndirilmiş məkanlar kimi yaradılıb və müharibə məntiqi ilə sıx bağlı olub", - o deyib.

Şarp qeyd edib ki, urbisidin müasir anlayışı binaların və infrastrukturun fiziki dağıdılmasından çox kənara çıxır.

Onun sözlərinə görə, bu gün konsepsiya həmçinin planlaşdırma və tikinti proseslərinin silahlı münaqişələrə necə cəlb olunduğunun təhlilini əhatə edir.

O vurğulayıb ki, bu cür halların sayının artması şəhər inkişafı ilə müharibələr arasındakı əlaqənin yenidən dərk edilməsini, eləcə də şəhər siyasəti və idarəetməyə yeni yanaşmaların işlənib hazırlanmasını tələb edir.

Oxşar xəbərlər

London İqtisadiyyat Məktəbində Bakı keyfiyyətli şəhər mühiti nümunəsi adlandırılıb

Fərid Şəfiyev: Qarabağda urbisid hərbi əməliyyatlardan sonra sistemli şəkildə keçirilib

BMT: Azərbaycan WUF13-də dialoq üçün məkan yaratmaqla dünyaya nümunə olur

Ceyms Şarp: Azərbaycan-Ermənistan sülh sazişinin mətni üzrə razılığın əldə edilməsi irəliyə doğru böyük addımdır

Ceyms Şarp: Azərbaycanla Ermənistan arasında vasitəçi olmadan aparılan danışıqlar böyük addımdır