Slovakiya və Macarıstanın Aİ-dən tələbi: "Dostluq" kəməri ilə neftin tədarükü təmin edilməlidir

Slovakiya və Macarıstan Avropa Komissiyasına "Dostluq" neft kəməri ilə Rusiya neftinin tədarükündə fasilələrlə bağlı şikayət edib.

"Report" xəbər verir ki, bu barədə Slovakiya nəşrləri məlumat yayıb.

Bildirilir ki, Slovakiya xarici işlər naziri Yuray Blanar və Macarıstanın xarici işlər və xarici ticarət naziri Peter Siyarto adından məktub Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallas və enerji məsələləri üzrə Avropa komissarı Dan Yorgensenə göndərilib.

Məktubda qeyd olunub ki, hadisə ilə əlaqədar tədarük azı beş gün müddətinə dayandırıla bilər. Bu baxımdan, Avropa Komissiyasının bu ilin yanvarında vəd etdiyi tədarükün təhlükəsizliyinə dair zəmanətləri təmin etməsi tələb olunur.

"Dostluq" neft kəmərinə qısa müddət ərzində üçüncü dəfə hücum edilib.

"Report" xəbər verir ki, bu barədə Macarıstanın xarici işlər və xarici ticarət naziri Peter Siyarto sosial şəbəkələrdə məlumat yayıb.

"Bu, ölkəmizin enerji təhlükəsizliyinə növbəti hücumdur. Macarıstana xam neft daşınması yenidən dayandırılıb!", - o qeyd edib.

Qeyd edək ki, "Dostluq" neft kəməri ilə Rusiya nefti Avropaya nəql olunur. Kəmər gündəlik 2 milyon barel ötürmə qabiliyyətinə malikdir.