Gəncədə ADAU-da “Prime Cotton Əməkdaşlıq və Karyera Mərkəzi”nin rəsmi açılışı olub - FOTO

Bu gün Gəncədə Azərbaycan Dövlət Aqrar Universitetində ölkəmizin pambıq sənayesinin lideri olan Prime Cotton şirkətinin dəstəyi ilə yaradılmış ölkənin ilk regional Karyera Mərkəzi olan “Prime Cotton Əməkdaşlıq və Karyera Mərkəzi”nin rəsmi açılış mərasimi olub.

Sizinxeber.az-nın yerli bürosunun məlumatına görə, açılış mərasimində Kənd Təsərrüfatı Naziri Məcnun Məmmədov, Gəncə Şəhər İcra Hakimiyyətinin başçısı Niyazi Bayramov, ADAU-nun Rektoru Zəfər Qurbanov, Türkiyənin Gəncə şəhərindəki Rəsmi Konsulu Recep Öztop, Prime Cottonun ana şirkəti olan GP Cotton Holdings şirkətinin Müşahidə Şurasının müşaviri Riçard Morqan, Prime Cotton Baş İcraçı Direktoru Rövşən Mahmudov və Prime Cotton əməkdaşları iştirak ediblər.Açılışdan sonra qonaqlar mərkəzlə tanış olublar.Bildirilib ki, bu Prime Cotton-un 30 illik yubileyində Azərbaycanın pambıqçılıq sənayesinin inkişafına xidmət edən mühüm layihə kimi həyata keçirilib.

Mərkəz, ADAU ilə Prime Cotton arasında 2024-cü ilin sentyabrında imzalanmış Anlaşma Memorandumuna əsasən fəaliyyətə başlayıb. Prime Cotton Baş İcraçı Direktoru,həmdə həm də Prime Cottonun İdarə Heyətinin sədri Rövşən Mahmudov bildirib ki ,Prime Cotton Əməkdaşlıq və Karyera Mərkəzinin əsas məqsədi tələbələrin bilik və bacarıqlarının artırılması, onları real iş mühiti ilə tanış etmək, eləcə də Prime Cotton-un kadr ehtiyaclarının qısa, orta və uzunmüddətli perspektivdə təmin olunmasıdır. Onun sözlərinə görə, bu mərkəz sadəcə sosial təşəbbüs deyil, eyni zamanda şirkət və universitet arasında dayanıqlı və strateji əməkdaşlığın təməlidir. O, mərkəzin gənc aqronom və mühəndislərin yetişdirilməsi üçün strateji əhəmiyyət daşıdığını və ADAU ilə əməkdaşlığın yeni mərhələsini simvolizə etdiyini vurğulayıb.Memorandum çərçivəsində mərkəz vasitəsilə pambıqçılıq sahəsinə maraq göstərən tələbələr üçün bir sıra fəaliyyətlər həyata keçiriləcək.

Tələbələr “Gənc Aqronom” və “Gənc Mexanik” təcrübə proqramları barədə məlumat alacaq, 1-4-cü kurs tələbələri arasından seçilən istedadlı gənclərlə “Prime Groups” komandaları yaradılacaq. Onlar üçün təlimlər, seminarlar, filial səfərləri və innovativ layihələrdə, o cümlədən “Agro Hackathon”da iştirak imkanları təmin olunacaq. Eyni zamanda, pambıqçılıqda 30 illik təcrübəyə malik Prime Cotton-un peşəkar mütəxəssisləri tərəfindən təlimlər keçiriləcək, tələbələr istehsalat təcrübəsinə cəlb ediləcək, elmi-tədqiqat layihələri və konfranslar təşkil olunacaq.

Bu təşəbbüs ADAU və Prime Cotton arasında dövlət-özəl tərəfdaşlığının uğurlu nümunəsi olmaqla, kənd təsərrüfatı sektorunda innovativ və dayanıqlı inkişafın təminatına mühüm töhfə verəcək. Hər iki tərəf əməkdaşlığın genişləndirilməsi və yeni layihələrin həyata keçirilməsi istiqamətində fəaliyyətlərini davam etdirməyi planlaşdırır.