Milli Kino Günü münasibətilə "CineMastercard" kinoteatrında xüsusi təklif olacaq, bütün Azərbaycan istehsalı filmlər cəmi 5 AZN-ə olacaq. Bu, yerli kino sənayesini dəstəkləmək və azərbaycanlı rejissorlara məxsus parlaq əsərlərin dadını çıxarmaq üçün əla fürsətdir.

Aksiya yalnız bir gün - 2 avqust tarixində keçərlidir və kinoteatr repertuarındakı bütün Azərbaycan filmlərinə şamil edilir.

Proqramda olacaq:

“Tağıyev: Çar” - Neft sənayeçisi, milyonçu, mesenat və xeyriyyəçi Hacı Zeynalabdin Tağıyevin həyatına həsr olunmuş dörd seriyalı filmin ikinci hissəsi. Film XIX əsrin sonu – XX əsrin əvvəllərində Bakıda və Azərbaycanın bölgələrində baş verən mühüm tarixi hadisələri əhatə edir. Layihə miqyasına görə Azərbaycan kinematoqrafiyası üçün əhəmiyyətli hadisəyə çevrilib.
Rejissor: Zaur Qasımlı.
Rollarda: Pərviz Məmmədrzayev, Qurban İsmayılov, Rasim Cəfərov, Elşən Rüstəmov, Natəvan Hacıyeva, Sanan Əlləz.

“Qapı” -Yeni həyat uğrunda oğurluq etməyə qərar verən üç qohum haqqında maraqlı kriminal tragikomediya. Hər şey planlaşdırıldığı kimi getmir və onlar gərgin psixoloji mübarizənin başladığı bir evdə tələyə düşürlər.
Rejissor: Vüsal Əhmədzadə.
Rollarda: Rafael İsgəndərov, Nurlan Rüstəmov, Taleh Yüzbəyov, Sənubər İsgəndərli, Kəmalə Piriyeva, Kamran Ağabalayev, Zemfira Əbdülsəmədova, Emil Musayev və İlkin Xəlil.

“Apatiya 2” - Anasını axtarmaq üçün uşaq evindən qaçan Akifin dramatik hekayəsi. Yolda o, cəmiyyətin biganəliyi və sərt reallıqla üzləşir. Film mühüm sosial və mənəvi məsələləri gündəmə gətirir.
Rejissor: Hikmət Rəhimov.
Rollarda: Tural Baxış, Şəhla Əligızı və Fuad Cabiyev.

“CineMastercard” kinoteatrı tamaşaçıları Azərbaycan kinosundan zövq almağa və milli kinematoqrafiyanın gücünü hiss etməyə dəvət edir.

Oxşar xəbərlər

“TAĞIYEV: NEFT” bədii filmi kinoteatrlarda təqdim olunacaq

"Tağıyev" filminin çəkilişləri başa çatıb, premyerası olacaq

“CineMastercard” kinoteatrında “Tağıyev: Neft” filminin təqdimatı keçirilib

İmişlidə "Muğanda Kino Günləri" çərçivəsində filmlər nümayiş olunacaq

Türkiyədə “Azərbaycan Kino Günləri” keçiriləcək