BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) gündəliyindəki hər üç əsas məsələ, şübhəsiz ki, Afrika ölkələri üçün də vacibdir.

"Sizinxeber.az" xəbər verir ki, bunu COP29-un baş icraçı direktoru Elnur Sultanov “CNBC-Africa”ya müsahibəsində deyib.

Qarşıdan gələn sammitin əsas istiqamətləri Yeni Kollektiv Kəmiyyət Məqsədi (NCQG), karbon bazarlarına dair 6-cı Maddə, İtki və Zərər Fondudur.

E.Sultanov bildirib ki, noyabrda Bakıda keçiriləcək konfrans əsasən iqlim maliyyəsi məsələlərinə həsr olunacaq: “Bu mövzunun əhəmiyyəti sözsüzdür. Gündəmdə olan üç əsas məsələ əvvəllər razılaşdırılmış 100 milyard dollarlıq iqlim maliyyəsinin məbləğinin artırılması, karbon bazarı ilə bağlı 6-cı Maddə və bəzi bazar əsaslı yanaşmalardır. Bu da iqlim maliyyəsinin bir aspektidir. İtki və Zərər Fondu məsələsi də buraya daxildir”.

COP29-un baş icraçı direktoru Bonn iqlim konfransı zamanı gündəliyin qəbulunu irəliyə doğru atılmış mühüm addım adlandıraraq, indiyədək əldə edilmiş irəliləyişlərlə bağlı nikbinliyini ifadə edib: “Bununla belə, xüsusilə iqlim böhranını həll etmək üçün iddialı və ədalətli maliyyə öhdəliklərinə nail olmaqla bağlı problemlər qalmaqdadır”.

Onun sözlərinə görə, davam edən danışıqlar COP29-un uğurunu və bütün iştirakçı tərəflərin öhdəlik səviyyəsini müəyyən etmək üçün çox vacibdir: “Yeni Kollektiv Kəmiyyət Məqsədinə (NCQG) gəlincə, gözləntilər daha yüksək idi, lakin bu, yeni başlayan marafondur. Biz sürət toplamaq və prosesi noyabr ayında uğurla başa çatdırmaq niyyətindəyik”.

Oxşar xəbərlər

COP29 gələn il Azərbaycanda keçiriləcək - RƏSMİ

Azərbaycan Maliyyə Nazirlərinin İqlim Fəaliyyəti üzrə Koalisiyasının nümayəndələri ilə əməkdaşlıq edəcək

Elvin Əşrəfzadə: İnklüzivlik COP29 sədrliyinin mühüm prinsiplərindən biridir

BMT-nin faktaraşdırıcı missiyası Azərbaycandadır

Muxtar Babayev: "COP29 şəffaflıq və inklüzivliyə həsr olunacaq"