Bakıda qalmaqallı məktəb direktoru İŞDƏN ÇIXARILDI

Bakıda töhmət verilən 201 nömrəli məktəbin direktoru işdən çıxarılıb.

Sizinxeber.Az xəbər verir ki, bu barədə Məktəbəqədər və Ümumi Təhsil üzrə Dövlət Agentliyi (MÜTDA) məlumat yayıb.

Bildirilib ki, MÜTDA-nın direktoru Eşqi Bağırovun müvafiq əmrinə əsasən, Bakı şəhəri 201 nömrəli tam orta ümumtəhsil məktəbinin direktoru Afaq Əliyeva fəaliyyətində yol verdiyi nöqsanlara görə vəzifəsindən azad edilib.

Xatırladaq ki, daha əvvəl Afaq Əliyevanın adı bir neçə qalmaqalda hallanıb - direktor məktəbin müəllimi Lalə Şəfaqətovanı keçmiş direktor müavini Svetlana Hüseynovaya qarşı yalançı şahidlik etməyə vadar edib və bu barədə səsyazısı yayılıb. Daha sonra Afaq Əliyeva ilə bağlı müvafiq qurumlara şikayət edən üç müəllim işdən çıxarılmışdı.