“Daşnaksutyun” üzvlərinin həbsinə başlanılıb, kütləvi aksiyalarla bağlı xəbərdarlıq edilib

Ermənistanda polis müxalifətdəki “Daşnaksutyun” partiyasının regional ofislərində axtarışlara və həbslərə başlayıb.

Sizinxeber.az “news.am”a istinadən xəbər verir ki, bu barədə sözügedən siyasi təşkilatdan bildirilib.

O da qeyd edilib ki, hakimiyyətin analoji addımları görülən tədbirlərə tutarlı cavab verilməsini şərtləndirib.

“Joğovurd” qəzeti yazıb ki, bir qrup partiya fəalı Türkiyədən səfərdən qayıdacaq Baş nazir Nikol Paşinyana etiraz əlaməti olaraq hava limanında aksiya keçirməyə hazırlaşıb.

Məlumatda həmçinin, yaxın saatlarda növbəti həbslərin gözlənildiyi də qeyd edilib.

Ermənistanın Daxili İşlər Nazirliyinin baş verənlərlə bağlı açıqlamasında bildirilib ki, ölkədə ictimai asayişin pozulmasına yönələn hərəkətlərin törədiləcəyi ilə bağlı məlumat daxil olub: “Bundan sonra polis əməkdaşlarının növbətçilik fəaliyyəti çərçivəsində bir qrup şəxslə profilaktik söhbətlər aparılıb. Biz bütün vətəndaşları ictimai qaydalara əməl etməyə çağırırıq. İstənilən qeyri-qanuni hərəkətə sərt şəkildə cavab veriləcək”.