Avropa Ağırlıqqaldırma Federasiyasının (EWF) prezidenti Antonio Konflittinin Bakıya səfəri zamanı beynəlxalq yarışların Azərbaycanda təşkili müzakirə olunub.

Bunu "Sizinxeber.az"a açıqlamasında Azərbaycan Ağırlıqqaldırma Federasiyasının (AAF) vitse-prezidenti Firdovsi Umudov deyib.

Qurum rəsmisi EWF rəhbərinin səfərinin detalları barədə danışıb:

"Konflittinin gəlişində məqsəd qurumlar arasında münasibətlərin sıxlaşdırılması, dostluq, əməkdaşlıq və tərəfdaşlıq əlaqələrinin möhkəmləndirilməsi, həmçinin ölkəmizin ağırlıqqaldırma infrastrukturu ilə yaxından tanışlıq, gələcəkdə beynəlxalq yarışların təşkili potensialını dəyərləndirmək idi. Biz daha əvvəl Beynəlxalq Ağırlıqqaldırma Federasiyasının prezidenti Məhəmməd Caludu dəvət etmişdik. Qurum olaraq bir gün üçün deyil, daimi uğurlar üçün strateji xəttimizi başlatmışıq və indi də davam etdiririk. Konflittinin səfəri çox səmərəli alındı. O, Azərbaycan çempionatını canlı izlədi, açılış və veteran ağırlıqqaldıranların təltifat mərasimində iştirak etdi. Sonra Ağırlıqqaldırma Mərkəzi ilə yaxından tanış oldu, idman qurğusunun imkanları barədə ətraflı məlumat aldı. "ASK Arena"da yerləşən ağırlıqqaldırma üzrə yığmaların dayaq bazasında yaradılan şəraitlə də tanış oldu".

F.Umudov EWF prezidentinin gənclər və idman naziri Fərid Qayıbovun qəbulunda olduğunu bildirib:

"Nazir müavini Mariana Vasileva və AAF-ın prezidenti Kamran Nəbizadə ilə birlikdə iştirak etdiyimiz görüş zamanı bir sıra məsələlər müzakirə olundu, ağırlıqqaldırmanın inkişafı üçün atılan və atılacaq addımlar danışıldı. Antonio Konflitti ölkəmizdə gördüklərindən razı qaldığını, Azərbaycanda ağırlıqqaldırmanın inkişafı üçün bütün lazımi şəraitin yaradıldığını qeyd etdi. Bununla yanaşı, ölkəmizdə beynəlxalq yarış və digər tədbirlərin keçirilməsini müzakirə etdik. Konflitti bildirdi ki, Azərbaycan buna hazırdır. Biz də öz növbəmizdə qeyd etdik ki, ölkəmizdə idmana dövlət tərəfindən ən yüksək səviyyədə diqqət və qayğı göstərilir. Bunun nəticəsində dünya səviyyəli yarışlar Azərbaycana həvalə olunur, uğurla da keçirilir. Ağırlıqqaldırma da bu sıraya daxil olacaq".

Oxşar xəbərlər

Fərid Qayıbov Avropa Ağırlıqqaldırma Federasiyasının prezidentini qəbul edib

AAF prezidenti türkiyəli həmkarı ilə görüşüb

Özbəkistan Cüdo Federasiyasının prezidenti Bakıya gəlib

AAF-ın vitse-prezidenti: Azərbaycan çempionatı və birinciliyində ümidverici nəticələrə şahidlik etdik

AAF-nin Ümumi Yığıncağı keçirilib, İdarə Heyətinə yeni üzvlər seçilib