Son günlər dünya bazarında neftin qiyməti aşağı düşsə də, bu, Azərbaycanın dövlət büdcəsinin icrasına ciddi risk yaratmır.

Bunu "Sizinxeber.az"a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Tahir Mirkişili əmtəə birjalarında "qara qızıl"ın ucuzlaşması ilə bağlı büdcəyə yenidən baxılması ehtimalına münasibət bildirərkən deyib.

"Beynəlxalq analitiklərin proqnozlarına görə, ABŞ prezidenti Donald Tramp gömrük tariflərini azaltsa, dünya iqtisadiyyatı resessiyadan yan keçəcək və bu il neftin 1 barelinin qiyməti orta hesabla 62 ABŞ dolları olacaq, əks təqdirdə isə qiymət 50 ABŞ dollarına düşəcək. Azərbaycanda neftin büdcə qiyməti baza ssenari üzrə 70 ABŞ dolları olsa da, Maliyyə Nazirliyi pessimist ssenari, yəni qiymətin 60 ABŞ dollarına düşməsinin təsiri ilə bağlı da proqnoz verib. Qiymətin 10 ABŞ dolları aşağı düşməsi dövlət büdcəsinin gəlirlərini 0,8 % və yaxud 340 milyon manat, Dövlət Neft Fondunun (ARDNF) gəlirlərini isə 14,5 % və yaxud 2,1 milyard manat azalda bilər. Bu ilin I rübündə isə dövlət büdcəsində 1,6 milyard manatdan çox profisit olub. Odur ki, büdcənin icrası ilə bağlı ciddi risk görünmür. Üstəlik, ölkənin böyük valyuta ehtyatları var. Hesab edirəm ki, hadisələrin gedişatına uyğun olaraq tarazlayıcı və əlverişli iqtisadi siyasət icra ediləcək", - deyə o qeyd edib.

Xatırladaq ki, aprelin 4-dən əmtəə birjalarında "Azeri Light" markalı Azərbaycan neftinin 1 bareli büdcədə nəzərdə tutulan həddən aşağı satılır. Artıq qiymət 68 ABŞ dollarından aşağı düşüb.

Oxşar xəbərlər

Tahir Mirkişili: "Gələn il üçün neftin büdcə qiyməti reallığa çox yaxındır"

Azərbaycan neftinin qiyməti 98 dollardan aşağı düşüb

Azərbaycan neftinin qiyməti 103 dollara yaxınlaşır

Azərbaycan neftinin son 30 ildə orta qiyməti açıqlanıb

Azərbaycanda neftin büdcə qiyməti 75 dollara qaldırılır