Azərbaycan Bolqarıstanın etibarlı strateji tərəfdaşıdır.

Azərbaycanın Bolqarıstandakı Səfirliyindən "Sizinxeber.az"a bildirilib ki, bunu həmin ölkənin Baş nazirinin müavini, iqtisadiyyat, sərmayə və sənaye naziri Aleksandr Pulev Sofiyada Azərbaycanın Müstəqillik Gününə həsr olunmuş rəsmi qəbulda deyib.

Tədbirdə fəxri qonaq qismində Bolqarıstanın Baş nazirinin müavini, iqtisadiyyat, sərmayə və sənaye naziri Aleksandr Pulevlə yanaşı, energetika naziri İva Petrova, innovasiya və rəqəmsal transformasiya naziri İvan Vasilyev, turizm naziri İlin Dimitrov, xarici işlər nazirinin müavini səfir Kristo Polendakov və digər nazir müavinləri, Prezident və Baş nazirin administrasiyalarının yüksək vəzifəli nümayəndələri, parlamentin deputatları, şəhərlərin merləri, universitetlərin rektorları, Bolqarıstanda akkreditə olunmuş səfirlər və diplomatik korpusun digər üzvləri, beynəlxalq təşkilatların nümayəndəliklərinin rəhbərləri, tanınmış ictimai-siyasi xadimlər, iş adamları, media rəhbərləri, Bolqarıstandakı Azərbaycan diasporunun üzvləri iştirak ediblər.

Tədbirin rəsmi hissəsi Azərbaycan və Bolqarıstanın Dövlət himnlərinin səsləndirilməsi ilə başlayıb, sonra Azərbaycanın Bolqarıstandakı fövqəladə və səlahiyyətli səfiri Elmar Məmmədov və Bolqarıstanın Baş nazirinin müavini Aleksandr Pulev çıxış ediblər.

E.Məmmədov çıxışında bu il müsəlman Şərqində ilk parlament respublikası olan Azərbaycan Xalq Cümhuriyyətinin yaradılmasının 108-ci ildönümünün qeyd olunduğunu diqqətə çatdıraraq, Azərbaycan Xalq Cümhuriyyətinin dövlətçilik ənənələrinin formalaşmasında mühüm rol oynadığını vurğulayıb.

Səfir Ümummilli Lider Heydər Əliyevin Azərbaycan dövlətçiliyinin qorunub saxlanılmasında və möhkəmləndirilməsində müstəsna rolunu xüsusi qeyd edib, Prezident İlham Əliyevin rəhbərliyi altında Azərbaycanın suverenliyini və ərazi bütövlüyünü bərpa etdiyini, işğaldan azad edilmiş Qarabağ və Şərqi Zəngəzurda genişmiqyaslı yenidənqurma və quruculuq işlərinin başlandığını, eləcə də davamlı sülhün təmin edilməsi məqsədilə Azərbaycanın təşəbbüsü ilə Ermənistanla sülh sazişinin paraflandığını bildirib.

İkitərəfli münasibətlərə toxunan E.Məmmədov Azərbaycan ilə Bolqarıstan arasında qarşılıqlı etimada, yüksək səviyyəli siyasi dialoqa və enerji, nəqliyyat, rəqəmsal bağlantılar, ticarət, mədəniyyət və təhsil sahələrində genişlənən əməkdaşlığa əsaslanan strateji tərəfdaşlığın mövcud olduğunu vurğulayıb.

Çıxış zamanı humanitar və mədəni əməkdaşlığın inkişaf edən istiqamətlərinə xüsusi diqqət yetirilib, Şuşa və Veliko Tırnovo şəhərləri arasında qardaşlaşma münasibətləri, eləcə də Veliko Tırnovo şəhərində inşa olunacaq "Şuşa Parkı" layihəsinin iki ölkə arasında dostluğun və strateji tərəfdaşlığın rəmzi olacağı vurğulanıb. Daha sonra bir neçə gün öncə Bakıda təşkil edilmiş Ümumdünya Şəhərsalma Forumunun 13-cü sessiyasının (WUF13) yaratdığı qlobal və regional miraslara, "Şəhərsalma və Arxitektura İli" çərçivəsində görülən işlərə, Bakının və Azərbaycanın regionlarının tarixi, mədəni və dini memarlıq irs abidələrinə dair ətraflı məlumat verilib və Bolqarıstan Prezidentinin, merlərinin və akademik dairələrinin WUF13-də fəal iştirakına görə təşəkkür edilib.

A.Pulev çıxışında Azərbaycan xalqını Müstəqillik Günü münasibətilə təbrik edib və Azərbaycanın Bolqarıstanın etibarlı strateji tərəfdaşı olduğunu vurğulayıb.

A.Pulev Azərbaycanın Bolqarıstanın enerji mənbələrinin şaxələndirilməsinə və regional enerji təhlükəsizliyinə verdiyi töhfəni yüksək qiymətləndirib, həmçinin Trans-Xəzər nəqliyyat dəhlizinin və Avropa ilə Asiyanı birləşdirən rəqəmsal bağlantı təşəbbüslərinin strateji əhəmiyyətini xüsusi olaraq qeyd edib. O, iki ölkə arasında ticarət-iqtisadi və qarşılıqlı sərmayə əməkdaşlığının daha da genişləndirilməsi üçün böyük potensialın mövcud olduğunu bildirib.

Qəbul zamanı qonaqlara xüsusi videoçarx nümayiş etdirilib, videoçarxda Azərbaycanın zəngin tarixi, mədəni və dini memarlıq irsi, Qarabağ və Şərqi Zəngəzurda həyata keçirilən genişmiqyaslı bərpa və yenidənqurma işləri, eləcə də Azərbaycanda elan olunmuş "Şəhərsalma və Memarlıq İli" çərçivəsində Bakı şəhərinin və Azərbaycanın regionlarının tarixi və müasir memarlıq üslublarının vəhdətini əks etdirən görüntülər təqdim olunub.

Tədbir bolqar bəstəkarı və pianoçusu Minko Lambov və vokalist Valentina Dimitrova tərəfindən Azərbaycan musiqi əsərlərinin ifa olunduğu mədəni proqramla davam edib, daha sonra qonaqlara Azərbaycan milli mətbəxinin nümunələri təqdim olunub.

Oxşar xəbərlər

Bolqarıstanın XİN başçısı Azərbaycana səfər edəcək

İva Petrova: “SGC Avropada həmrəylik və strateji öhdəliyin ən müasir nümunəsidir”

Gürcüstanda daxili işlər naziri Baş nazirin müavini təyin edilib

Qazaxıstanın yeni iqtisadiyyat nazirinin adı məlum olub - YENİLƏNİB

Ukraynada müdafiə nazirinin daha bir müavini işdən çıxarılıb