"Ermənistan Elektrik Şəbəkələri" ictimai müəssisə kimi tanına bilər

Ermənistan hökuməti iyulun ortalarında "Ermənistan Elektrik Şəbəkələri" QSC-nin ictimai müəssisə kimi tanınması məsələsinə baxacaq.

"Report" Ermənistan mediasına istinadən xəbər verir ki, bu barədə jurnalistlərə şirkətin müvəqqəti idarəedicisi Romanos Petrosyan bildirib.

Onun sözlərinə görə, gələcəkdə şirkət konsessiya idarəetməsinə verilə bilər. Bununla yanaşı, konsessioner həmçinin infrastrukturun inkişafına investisiyalar yatırmağa borclu olacaq.

Daha əvvəl hökumətdə qeyd edilib ki, şirkətin statusu ilə bağlı qərar iyulda qəbul ediləcək.

Məlumat üçün qeyd edək ki, konsessiya idarəetməsi dövlətə məxsus əmlakın və ya xidmət sahələrinin müəyyən müddətə və şərtlərlə özəl (yerli və ya xarici) investorlara, şirkətlərə verilməsidir.