Ermənistanın Baş naziri Nikol Paşinyan İrəvan və Moskva arasında müşahidə olunan gərginlik fonunda İrəvan üçün Rusiya qazının qiymətinin artırılmasını istisna edib.

"Report" xəbər verir ki, Baş nazir bunu "Facebook" səhifəsində əlçatan olan mətbuat konfransı zamanı bildirib.

"Belə bir şey ola bilməz, çünki bizdə qüvvədə olan müqavilə var və o qarşılıqlı faydalıdır", - Rusiya qazının qiymətinin mümkün artırılması barədə suala cavab verən Paşinyan bəyan edib.

Baş nazirin sözlərinə görə, İrəvanın və Moskvanın "qazın qiyməti ilə bağlı aydın strateji razılaşmaları var" və tərəflər onlara "riayət etməlidirlər".

N.Paşinyan həmçinin Rusiyanın Ermənistandan gül idxalına qoyulan qadağanı şərh edib.

"Güllərə məhdudiyyətlər həmişə olub, çünki Avrasiya İqtisadi İttifaqının fitosanitar normalarına uyğun gəlməyən istənilən məhsul məhdudiyyətlərlə üzləşir. İl ərzində belə hallar onlarla olub və təkcə güllər üzrə deyil, həm də digər məhsullar üzrə, bu məsələlər Avrasiya İqtisadi İttifaqı çərçivəsində, o cümlədən digər ölkələr tərəfindən mütəmadi olaraq müzakirə edilir", - o bildirib.

Qeyd edək ki, "Rosselnadzor" mayın 22-dən Ermənistandan gül idxalına müvəqqəti məhdudiyyətlər tətbiq edib. Qərar Rusiyanın fitosanitar rifahının və ixrac potensialının qorunması ilə əsaslandırılıb.

Oxşar xəbərlər

Paşinyan: Ermənistan Rusiya ilə münasibətləri gərginləşdirmək və ya pozmaq niyyətində deyil

Paşinyan: Azərbaycanın logistik marşrutlarına Ermənistanın inteqrasiyası ABŞ-Rusiya əlaqələrinə müsbət təsir göstərəcək

Paşinyan: Aİ standartlarına uyğunluq Ermənistanın birinci dərəcəli məqsədidir

Putin və Paşinyan Ermənistanın KTMT-dəki fəaliyyətini müzakirə etməyiblər

Paşinyan: Ermənistan KTMT ilə geridönüşü olmayan nöqtəyə yaxındır