Moskvada Azərbaycanın Dövlət Bayrağı Gününə həsr olunmuş musiqi festivalı keçirilib - FOTOLENT - VİDEO

Moskvanın Xalq Təsərrüfatı Nailiyyətləri Sərgi Mərkəzinin (VDNX) “Azərbaycan” pavilyonunda Azərbaycanın Dövlət Bayrağı Gününə həsr olunmuş beynəlxalq klassik musiqi festivalı keçirilib.

Sizinxeber.az-nın Moskva müxbiri xəbər verir ki, “Konsonans” musiqi festivalı “Qara Qarayev gecəsi” beynəlxalq musiqi layihəsi çərçivəsində baş tutub. Tədbir ənənəvi olaraq Moskvanın Qara Qarayev adına Moskva Uşaq Musiqi Məktəbi və VDNX-dki “Azərbaycan pavilyonunun təşkilatçılığı ilə keçirilib. Layihənin əsas məqsədi istedadlı gənc ifaçıların üzə çıxarılması və müxtəlif ölkələrin musiqi müəssisələri arasında yaradıcılıq əlaqələrinin qurulmasıdır.

Tədbirdə gənc ifaçılar - beynəlxalq və respublika müsabiqələri laureatları, o cümlədən Qara Qarayev adına məktəbin və Milli Konservatoriyanın nəzdində Respublika İncəsənət Gimnaziyasının məzun və tələbələri iştirak ediblər. Bakıdan iki nəfər, Respublika İncəsənət Gimnaziyasının 11-ci sinif şagirdi Abid Cəlilov və 9-cu sinif şagirdi İnci Abbasova musiqi festivalına qatılıblar. Festivala İtaliyadan olan gənc musiqiçilər onlayn formatda qoşulublar.

Moskvadakı Q.Qarayev adına Uşaq Musiqi Məktəbinin direktoru Andrey Leonov qeyd edib ki, “Konsonans” festivalı artıq üçüncü dəfədir ki VDNX-nin “Azərbaycan” pavilyonunda keçirilir. “Bu il festivalımız Azərbaycanın Dövlət Bayrağı Gününə həsr olunub. Göründüyü kimi, səhnə ölkələrimiz arasında dostluq rəmzi olaraq Rusiya və Azərbaycanın bayraqları ilə bəzədilib”.

Məktəb direktoru onu da bildirib ki, gələn ilin aprel ayında Moskvada Qara Qarayev adına ənənəvi Beynəlxalq Müsabiqə keçiriləcək. “Bu dəfə festival bütün alətlər üzrə keçiriləcək. Biz bir il bütün alətlər üzrə, o biri il isə piano və fortepiano ansamblı üçün festival keçiririk”, - deyə A.Leonov bildirib.

“Konsonans” festivalının proqramında 19-20-ci əsr klassiklərinin: Şubert, Qlinka, Debüssi, Skryabin, Raxmaninov, Üzeyir Hacıbəyli, Medtner, Dvarionas, Qara Qarayev, Vaqif Mustafazadə və başqa bəstəkarların əsərləri səsləndirilib.

Qeyd edək ki, “Konsonans” festivalının əsas təşkilatçısı olan Qara Qarayev adına Moskva Uşaq Musiqi Məktəbi Azərbaycandan kənarda görkəmli Azərbaycan bəstəkarı Qara Qarayevin adını daşıyan yeganə təhsil ocağıdır. Məktəb 2002-ci ildən Qara Qarayevin adını daşıyır.