Merz: Almaniya təhlükəsizlik məsələlərində daha çox məsuliyyət götürəcək

Almaniya kansleri Fridrix Merz ABŞ Prezidenti Donald Trampla telefon danışığı zamanı Almaniyanın təhlükəsizlik məsələlərində daha böyük məsuliyyət daşıyacağını bəyan edib.

Sizinxeber.az xəbər verir ki, bu barədə Almaniya hökumətinin rəsmi nümayəndəsi Ştefan Kornelius jurnalistlərə açıqlamasında bildirib.

Onun sözlərinə görə, Merz söhbət zamanı Trampı ABŞ-ın müstəqilliyinin 250 illiyi münasibətilə təbrik edib və almanlarla amerikalılar arasında xüsusi münasibətlərin mövcudluğunu vurğulayıb.

Kornelius qeyd edib ki, tərəflər Ankara şəhərində keçiriləcək NATO sammiti ərəfəsində mövqelərini də uzlaşdırıblar.

"Kansler vurğulayıb ki, Almaniya Avroatlantik regionun təhlükəsizliyi naminə daha çox məsuliyyət götürəcək. Onun sözlərinə görə, NATO transatlantik alyans olaraq qalması üçün daha çox Avropa yönümlü olmalıdır", – deyə Almaniya hökumətinin nümayəndəsi bildirib.

O əlavə edib ki, Merz və Tramp Ankara sammiti çərçivəsində danışıqları davam etdirmək barədə razılığa gəliblər.