Gürcüstan parlamentinin sədri: Qərb payızda ölkədə sabitliyi pozmağa cəhd göstərəcək

Qərb bu ilin payızında Gürcüstanda keçiriləcək yerli seçkilər ərəfəsində ölkədə vəziyyəti yenidən gərginləşdirməyə çalışacaq.

APA xəbər verir ki, bu barədə Gürcüstan parlamentinin sədri Şalva Papuaşvili "İmedi" telekanalına açıqlamasında bildirib.

“Artıq ilk əlamətləri görürük. Xaricdən sabitliyi pozmaq cəhdləri var. Brüsselin bəzi addımları bizə göstərir ki, ölkəmizin xaricdən təzyiqlərlə sabitliyin pozulmasına cəhd ediləcək. Necə ki, əvvəlki seçkilərdə də belə cəhdlər olmuşdu və sonradan bu, seçkilərə müdaxilə kimi qiymətləndirildi. Düşünürəm ki, bu dəfə də oxşar məktublar və qətnamələr vasitəsilə ölkədə sabitliyin pozulmasına cəhd ediləcək,” – deyə Papuaşvili vurğulayıb.

Qeyd edək ki, Gürcüstanda yerli özünüidarəetmə orqanlarına seçkilər oktyabrın 4-də keçiriləcək.