Avropanın dörd ölkəsi “Şərq qalxanı” və Baltik müdafiə xətti ilə bağlı Aİ-dən dəstək istəyib

Estoniya, Latviya, Polşa hökumət başçıları və Litva prezidenti Avropa İttifaqı rəhbərliyinə açıq məktubla müraciət edərək, İttifaqın şərq sərhədində müdafiə təşəbbüslərinə dəstəyin gücləndirilməsinə çağırıblar.

APA xəbər verir ki, sənədi Estoniyanın Baş naziri Kristen Mixal sosial şəbəkə hesabında paylaşıb.

Məktubun müəllifləri olan Estoniyanın Baş naziri Kristen Mixal, Latviyanın Baş naziri Evika Siliņa, Litva Prezidenti Gitanas Nauseda və Polşanın Baş naziri Donald Tusk Rusiyadan və Belarusdan qaynaqlanan təhlükəyə diqqət çəkiblər.

Onlar xüsusilə sabitliyi pozan fəaliyyətlər, diversiya halları və miqrantlardan təzyiq aləti kimi istifadənin narahatlıq doğurduğunu bildiriblər.