Yevlaxda həmkəndlilərin mübahisəsi qətllə nəticələnib - YENİLƏNİB

Yevlaxda qəsdən adam öldürməkdə şübhəli bilinən şəxs tutulub.

Yevlax rayon prokurorluğundan Sizinxeber.az-ya verilən məlumata görə, iyulun 27-də Yevlax rayonunun Çənlibel qəsəbəsi ərazisində qəsdən adam öldürülməsinə dair rayon prokurorluğuna məlumat daxil olub.

Araşdırma zamanı 1962-ci il təvəllüdlü İlham Mirzəyevin rayonun Çənlibel qəsəbəsində bıçaqla həmkəndlisi 1978-ci il təvəllüdlü Habil Kərimova xəsarət yetirərək qəsdən öldürməsinə əsaslı şübhələr müəyyən edilib.

Faktla bağlı Yevlax rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb.

İlham Mirzəyəv şübhəli şəxs qismində tutularaq istintaqa cəlb edilib.

Hazırda cinayət işi üzrə istintaq tədbirləri davam etdirilir.

***

27 iyul, 21.32

Yevlax şəhərində iki nəfər arasında baş verən mübahisə qanlı sonluqla nəticələnib.

Sizinxeber.az-nın yerli müxbirinin məlumatına görə, hadisə Yevlax şəhər ərazisində qeydə alınıb.

1962-ci il təvəllüdlü Mirzəyev İlham Məmmədiyyə oğlu, 1978-ci il təvəllüdlü həmyerlisi Kərimov Habil Kərim oğlunu bıçaqlayıb.

Aldığı xəsarətlər nəticəsində Habil Kərimov həyatını itirib.

Qətli törətməkdə şübhəli bilinən İlham Mirzəyev Yevlax Rayon Polis Şöbəsinin əməkdaşları tərəfindən saxlanılıb və istintaqa təhvil verilib.

Məlumata görə, hadisə baş verən zaman şübhəli şəxs sərxoş vəziyyətdə olub.