16 
Ara
2023
14:31

Turalənin ölümünə səbəb olanlar azadlıqdadır - Atası

16 Ara, 2023
14:31
25

Turalənin ölümünə səbəb olanlar azadlıqdadır - Atası

2023-cü ilin iyul ayının 19-da Mingəçevir şəhər Prokurorluğunun binasından özünü ataraq intihar etdiyi deyilən Turalə Aslanovanın atası Natiq Aslanov açıqlama verib.

Sizinxəbər.az xəbər verir ki, o, Globalinfo.az-a açıqlamasında istintaqın davam etdiyini bildirib:

“Hazırda heç bir dəyişiklik yoxdur, istintaq davam edir, hər şeyin yaxşı olacağını deyirlər. Baş verən hadisədən sonra qızımın ölümünə səbəb olan Kəmalə Quliyeva ilə müstəntiq Zaur Tanrıverdiyevi işdən azad ediblər. Lakin onlar azadlıqdadırlar və bu, məni narahat edir”.

N.Aslanov tez-tez prokurorluğa getdiyini deyib:

“İşimizi Bakı Şəhər Baş Prokurorluğu araşdırır. Onlar dəvət edən zaman da gedirəm, bəzən çağırılmasam da gedirəm, maraqlanıram. Yetərincə sübutlar təqdim etmişəm, amma hələ həbs olunan bir kimsə yoxdur. İstintaqın bitməsini gözləyirik. Ümid edirəm ki, cinayətkarlar öz cəzalarını layiqincə alacaqlar. Mən itirdiyimi itirmişəm, bu işin sonuna qədər gedəcəm. Adım kimi əminəm ki, qızımı otaqda öldürüblər. Ona görə də, qatillər azadlıqda gəzə bilməzlər”.

Qeyd edək ki, 32 yaşlı Turalə Aslanovanın Mingəçevir şəhər Prokurorluğunda intihar etdiyi iddia edilsə də, ailəsi onun öldürüldüyündən şübhələnir.

Xatırladaq ki, Turalə Aslanovanın 413 min manat məbləğdə pulu mənimsədiyi bildirilir.

Bizimlə əlaqə saxlayın