BP: "Şahdəniz" yatağı bir sıra ölkələrə xidmət edir

"Şahdəniz" qaz-kondensat yatağı Azərbaycandan tutmuş Avropanın ürəyinə qədər bir sıra ölkələrə xidmət edir.

"Sizinxeber.az-Economics" xəbər verir ki, bunu Bakıda keçirilən sayca 30-cu Yubiley “Baku Energy Forum”unda çıxış edərkən BP-nin Azərbaycan, Gürcüstan və Türkiyə regionunun maliyyə üzrə vitse-prezidenti Kolin Allan deyib.

Onun sözlərinə görə, "Şahdəniz" yatağı özünü etibarlı qaz təchizatçısı kimi sübut edib, bununla da regional enerji təhlükəsizliyini əhəmiyyətli dərəcədə gücləndirib.

Kolin Alan onu da vurğulayıb ki, "Şahdəniz" həqiqətən etibarlı təchizatçıdır: keçən il istehsal güclərinin etibarlılıq səviyyəsi 99%-i ötüb.

"Bu, mühüm göstəricidir. Bununla yanaşı, yataq xidmət göstərilən bazarlarda tədarükün şaxələndirilməsini təmin edir və bəzi hallarda əhəmiyyətli pay alır. Məsələn, İtaliyaya tədarük onun ümumi qaz bazarının təxminən 16%-ni təşkil edir", - Kolin Alan vurğulayıb.