Tacikistanın paytaxtı Düşənbə şəhərində Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Azərbaycan Sədrliyinin, habelə AQEM Katibliyinin təşkilatçılığı ilə “Su təhlükəsizliyi və iqlim dözümlülüyü: AQEM üzv dövlətlərində ətraf mühit çağırışlarının həlli” adlı tədbir keçirilib.

Bu barədə “Report”a Azərbaycanın Xarici İşlər Nazirliyindən bildirilib.

Tədbir Buzlaqların Qorunub Saxlanması üzrə Yüksək Səviyyəli Beynəlxalq Konfrans çərçivəsində baş tutub.

Tədbirdə Azərbaycanın AQEM sədrliyi və COP29 sədrliyi adından çıxışlar səslənib, ölkəmizin AQEM çərçivəsində həyata keçirdiyi fəaliyyət, o cümlədən ətraf mühit ölçüsünə verdiyi önəm vurğulanıb, COP29-un uğurlu nəticələri, eləcə də qlobal və regional səviyyədə su təhlükəsizliyi və əməkdaşlıq məsələrinə verdiyi töhfəsi ilə bağlı məlumat verilib.

İştirakçılar iqlim dəyişmələri nəticəsində buzlaqların əriməsinin sürətlənməsinin su təhlükəsizliyinə təsiri ilə bağlı müzakirələr aparıb, iqlim adaptasiyası və uzunmüddətli dayanıqlılığın vacibliyini vurğulayıblar. Su mənbələrinin effektiv idarə edilməsi istiqamətində əməkdaşlıq və birgə fəaliyyətin önəmini diqqətə çatdırıblar.

Həmçinin, AQEM üzv dövlətlərinin yerləşdiyi regionda iqlim dəyişmələrindən irəli gələn su təhlükəsizliyi ilə bağlı çağırışlar və onların həlli yolları, eləcə də su sahəsində idarəçiliyin ərzaq təhlükəsizliyinə təsiri barədə təqdimatlar edilib.

Oxşar xəbərlər

Bakıda AQEM-in Yüksək Vəzifəli Şəxslər Komitəsinin birinci iclası keçiriləcək

Alim Bayel: Azərbaycan COP29 çərçivəsində AQEM-ə sədrlik edəcək

Prezident AQEM-in Baş katibini qəbul edib

Ceyhun Bayramov AQEM-in iclasında iştirak edir

AQEM Nazirlər Şurasının 7-ci görüşündə bir sıra sənədlər qəbul edilib