Azərbaycan Prezidenti İlham Əliyevin Çin Xalq Respublikasına (ÇXR) səfəri iki ölkə arasındakı münasibətləri ən yüksək mərhələyə daşıyacaq.

Bu barədə "Report"a açıqlamasında Azərbaycan Milli Məclisinin deputatı Vüqar İsgəndərov deyib.

Deputat Azərbaycan və Çin arasındakı münasibətlərin yeni mərhələyə qədəm qoymasının hər iki ölkə üçün çox faydalı olacağını bildirib:

"İlham Əliyevin qarşılanmasından başlayaraq strateji münasibətləri formalaşdıran protokolun imzalanması və zəngin səfər proqramı bunu deməyə əsas verir. Hazırda Çin dəyişən dünyada qlobal güclərdən biri kimi çıxış edir. Bu ölkə dünya nizamının formalaşmasında əvəzsiz rol oynayır. Özünün siyasi, iqtisadi, hərbi gücünü artırmaqla son 20 ildə dünyanın ən güclü iqtisadiyyatlarından biri olaraq iqtisadi məsələlərdə aparıcı rol oynaması Azərbaycanın da Çinlə olan münasibətlərində yeni mərhələnin başlamasına əsas yaradır".

V.İsgəndərovun sözlərinə görə, Çin də Azərbaycanın həm bölgədə, həm də qlobal aləmdə artan nüfuzunu görür:

"Çin yaxşı bilir ki, Orta Dəhliz məsələsinin reallaşmasında Zəngəzur dəhlizi vacib rol oynayır. Son illərdə Azərbaycanın qazandığı uğur və naliyyətləri Çin də yüksək qiymətləndirir. Bunu ÇXR Sədri Si Cinpin də çıxışında bildirib".

Deputat qeyd edib ki, ümumiyyətlə iki ölkə arasında imzalanan sənədlər, qarşıya qoyulan proqramlar hər iki ölkənin geosiyasi vizyonunda və gələcək fəaliyyətlərində əsas xətti özündə ehtiva edir:

"Bunlara iqtisadi, siyasi və mədəni əlaqələrin yüksək səviyyəyə çatdırılması da aiddir. Hazırda Azərbaycanın ədalətsiz idarədən yayınıb öz milli maraqlarını önə çəkərək inkişaf etməsi, ikitərəfli və çoxtərəfli tərəfdaşlıqlarda aktiv rol oynaması, eləcə də Azərbaycanın yerləşdiyi ərazidən Çin məhsullarının digər ölkələrə daşınmasında Azərbaycanın uyğun mövqedə yerləşməsi Çinin Azərbaycana olan marağını artırır".

V.İsgəndərov bütün bunların hər iki ölkənin artan nüfuz, sürətli inkişaf və bir-biri üçün əvəzsiz strateji münasibətlərin dostluğa və gələcək müttəfiqliyə çevriləcəyinin anonsu olduğunu vurğulayıb.

Oxşar xəbərlər

Spiker: Azərbaycan-Türkiyə münasibətləri özünün ən yüksək səviyyəsinə çatıb

Bəxtiyor Mustafayev: İlham Əliyevin Özbəkistana səfəri çoxşaxəli əməkdaşlıqda yeni mərhələyə işarə edir

Deputat: Misirlə Azərbaycan arasında dini-mənəvi sahədə yüksəksəviyyəli əməkdaşlıq mövcuddur

Azərbaycanla Çin arasında hərtərəfli tərəfdaşlıq münasibətlərin gələcək inkişafı üçün möhkəm təməl yaradır - RƏY

Azərbaycan BRICS-lə qarşılıqlı faydaya əsaslanan əməkdaşlığın tərəfdarıdır - RƏY