Azərbaycan Dövlət Uşaq Filarmoniyasında gənc istedadları, müəllimləri, valideynləri və incəsənətsevərləri bir araya gətirən "Nağılın qonağında" adlı musiqili-poetik konsert keçirilib.

"Report" xəbər verir ki, konsertin təşkilatçıları beynəlxalq və respublika müsabiqələri laureatı, caz və estrada ifaçısı Günel Hacıyeva, həmçinin "Modern Poems" və "Gənc Şairlər" layihələrinin rəhbəri Lala Həsənova olublar.

Konsert proqramında 35 istedadlı uşaq iştirak edib. Tədbirdə fortepiano və vokal üzrə solo nömrələr, vokal ansambllarının çıxışları, fortepiano duetləri, şeir nümunələri və teatr səhnəcikləri təqdim olunub.

Çıxışlar sırasında məşhur və sevilən cizgi filmlərinin motivləri əsasında hazırlanmış teatr tamaşaları və musiqi nömrələri yer alıb. Balaca iştirakçılar nağıl və cizgi filmi qəhrəmanlarının rəngarəng geyimlərində səhnəyə çıxaraq tədbirə əsl bayram və sehrli ab-hava bəxş ediblər. Onların yaradıcı obrazları sayəsində konsert musiqi və poeziyanı teatr elementləri ilə birləşdirən maraqlı səhnə tamaşasına çevrilib.

Tədbirdə "Gənc Şairlər" ədəbi layihəsinin iştirakçıları və Günel Hacıyevanın şagirdləri çıxış ediblər.

Layihənin əsas məqsədi uşaqların yaradıcılıq potensialının inkişaf etdirilməsi, musiqi və ədəbiyyat sənətinin gənc nəslə sevdirilməsi və təbliğ olunmasıdır. Xüsusilə qeyd edilməlidir ki, layihə xeyriyyəçilik əsasında həyata keçirilir.

Oxşar xəbərlər

Gəncə Dövlət Filarmoniyasında "Ruhun qidası" adlı konsert proqramı baş tutub

Azərbaycan millisinin futbolçusu Xəyal Əliyev müalicə üçün Madridə yollanıb

Şuşada Zəfər Günü münasibətilə konsert keçirilib

Gəncə Filarmoniyasında "Ruhun qidası" adlı konsert olacaq

Gürcüstanın Müstəqillik Günü münasibətilə Bakıda qala konsert keçirilib