Kreditinizi "Birbank"a gətirin, 6 %-dək endirim qazanın

"Birbank" digər banklardakı kredit öhdəliklərini daha sərfəli şərtlərlə idarə etmək istəyənlər üçün yeni fürsət yaradır. Belə ki, ölkənin ilk rəqəmsal bankı yeni kampaniya çərçivəsində digər banklardakı kreditlərini "Birbank"a gətirən müştərilərə 6 %-dək endirim təqdim edir.

1 iyun tarixinədək davam edəcək kampaniya müştərilərə yalnız daha sərfəli faiz şərtləri deyil, həm də aylıq kredit ödənişlərini azaltmaq və bütün kredit öhdəliklərini bir yerdən daha rahat idarə etmək imkanı yaradır.

Kampaniya çərçivəsində "Kapital Bank"dan və ya istənilən digər bankdan əməkhaqqı və ya təqaüd alan şəxslər 50 000 manatadək nağd pul kreditini 59 ayadək müddətə əldə edə bilərlər.

"Birbank"ın təqdim etdiyi yeni imkan xüsusilə bir neçə kredit ödənişi olan və daha rahat maliyyə idarəçiliyi axtaran müştərilər üçün əlverişli həlldir. Kreditlərin bir mərkəzdə birləşdirilməsi həm ödəniş prosesini sadələşdirir, həm də maliyyə yükünü daha rahat planlaşdırmağa imkan verir.

Kampaniyadan yararlanmaq istəyənlər onlara ən yaxın "Kapital Bank"/"Birbank" filialına yaxınlaşaraq bu fürsəti dəyərləndirə bilərlər.

Ətraflı məlumat üçün link: www.b-b.az/rkpr

Ölkənin birinci bankı "Kapital Bank" "PAŞA Holding"ə daxildir və Azərbaycanda ən böyük filial şəbəkəsi, 114 filialı və 53 şöbəsi ilə müştərilərin xidmətindədir. Bankın məhsul və xidmətləri barədə daha ətraflı məlumat almaq üçün https://kapitalbank.az saytına, 196 Əlaqə Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz. Nağd pul krediti və "Birbank" kartı sifarişlərinizi onlayn formada həyata keçirə bilərsiniz.

ING: Azərbaycanın cari əməliyyatlar hesabının profisiti 2026-cı ildə ÜDM-in 10 %-ni təşkil edə bilər

Hörmüz boğazı ətrafındakı vəziyyətlə əlaqədar dünya bazarlarında neft qiymətlərinin yüksək olması fonunda Azərbaycanın cari əməliyyatlar hesabının profisiti 2026-cı ildə ümumi daxili məhsulun (ÜDM) 9-10 %-ni təşkil edə bilər.

"Report" Niderlandın ən böyük bank qrupu olan "ING Group"a istinadən xəbər verir ki, xammal mallarının qiymətinin artması və portfel investisiyalarının əhəmiyyətli dərəcədə axını MDB-4 regionu ölkələrində (Azərbaycan, Ermənistan, Qazaxıstan və Özbəkistan) karbohidrogen ixracatçılarının xarici buferlərini gücləndirir və regional valyutaların məzənnələrini dəstəkləyir.

Yaxın Şərqdəki eskalasiya, o cümlədən Hörmüz boğazı ətrafında davam edən gərginlik və risklər xammal üzrə yüksək qiymətləri möhkəmləndirib. Mövcud vəziyyəti nəzərə alaraq ING 2026-cı il üçün neft qiymətləri üzrə proqnozunu 4 ABŞ dolları artıraraq bir barel üçün 93 ABŞ dollarına çatdırıb. Makroiqtisadi həssaslığa əsasən, Azərbaycan və Qazaxıstan əsas benefisiarlar olaraq qalır, Özbəkistan və Ermənistanda isə vəziyyət daha balanslaşdırılmış görünür.

"Neft qiymətlərinin yeni ssenarisində Azərbaycanın cari əməliyyatlar hesabının profisiti bu il ÜDM-in 9-10 %-ni, icmal büdcənin profisiti isə ÜDM-in 4 %-ni təşkil edə bilər", - hesabatda qeyd edilib.

ING-nin qiymətləndirmələrinə görə, qlobal iqtisadiyyatdakı vəziyyətlə əlaqədar olaraq MDB-4 ölkələri hazırda müəyyən inflyasiya təzyiqi ilə üzləşirlər.

Bununla yanaşı, inflyasiya təzyiqinin artması pul-kredit siyasətinin sərtləşdirilməsi istiqamətində proqnozlara yenidən baxılmasına gətirib çıxarır. Bildirilib ki, bu halın regionda iqtisadi fəallığa əhəmiyyətli dərəcədə təsir edəcəyi ehtimalı azdır.

Analitiklər vurğulayırlar ki, portfel investisiyalarının güclü axını MDB-4 valyutaları üçün əsas müsbət amildir.

"Biz ötən ayla müqayisədə MDB-4 ölkələrnin üzən valyutalarının qısa və ortamüddətli perspektivlərinə daha nikbin baxırıq. Lakin iqtisadiyyatların struktur transformasiyasında əldə olunan uğurlar təsdiqlənənə qədər uzunmüddətli baxışımızda ehtiyatlı qalırıq. Portfel axınlarından yüksək asılılıq "ikiuclu çomaq" ola bilər, çünki birbaşa xarici investisiyalar (BXİ) sahəsindəki strateji tərəfdaşlardan fərqli olaraq, maliyyə investorları asanlıqla çaxnaşmaya düşürlər", - ING ekspertləri hesab edirlər.

Analitiklərin fikrincə, idxal inflyasiyası (Avropa İttifaqı, Çin və digər tərəfdaşlarla əlaqələr vasitəsilə) ilə yanaşı, daxili amillər də Azərbaycan istisna olmaqla əksər iqtisadiyyatlarda təzyiqləri gücləndirir.

"Azərbaycan idxal inflyasiyası risklərinə məruz qalır ki, bu da Azərbaycan Mərkəzi Bankının (AMB) 2026-2027-ci illər üçün yenidən nəzərdən keçirilmiş inflyasiya proqnozunda öz əksini tapıb, lakin ÜDM-in artım templərinin yüksək olmaması səbəbindən zəif daxili təzyiq nümayiş etdirir. Bununla əlaqədar olaraq, 2026-2027-ci illər üçün MDB-4 ölkələrində inflyasiyanın artım istiqamətində yenidən nəzərdən keçirildiyini təsdiqləyirik", - ING ekspertləri vurğulayıblar.

Qeyd edək ki, qlobal enerji bazarlarındakı mövcud vəziyyəti nəzərə alaraq, AMB 2026-cı il üçün tədiyyə balansının cari əməliyyatlar hesabının profisitinə dair proqnozunu əhəmiyyətli dərəcədə yaxşılaşdıraraq 5,5 milyard ABŞ dollarına (may ayı qiymətləndirməsi) çatdırıb. AMB fevral ayında isə cari əməliyyatlar hesabının profisitini 2,8-3 milyard ABŞ dolları qiymətləndirmişdi.

Xatırladaq ki, 2025-ci ilin yekunlarına əsasən, Azərbaycanın tədiyə balansının cari əməliyyatlar hesabının profisiti 3,5 milyard ABŞ dolları və ya ÜDM-in 4,6 %-ni təşkil edib.

ICD Azərbaycan, Türkiyə və Mərkəzi Asiya ölkələrini birləşdirəcək layihə icra edir

Özəl Sektorun İnkişafı üzrə İslam Korporasiyası (ICD) Azərbaycan, Türkiyə və Mərkəzi Asiya ölkələrini birləşdirəcək layihə icra edir.

Bunu "Sizinxeber.az"a açıqlamasında qurumun Korporativ Strategiya və Tədqiqat bölməsinin meneceri Elvin Əfəndi bildirib.

"Bu layihə onun iştirakçısı olan ölkələrinm qlobal dəyər zəncirinə çıxışını, ixrac-idxal imkanlarını artıracaq. Hazırda biz Azərbaycanda müxtəlif dövlət qurumları ilə, özəl sektorla danışıqlar aparırıq ki, fermerləri, kiçik-orta sahibkarları bu layihənin tərkib hissəsi edə bilək", - deyə o qeyd edib.

E.Əfəndinin sözlərinə görə, həm ICD-nin, həm də Ticarətin Maliyyələşdirilməsi üzrə İslam Korporasiyasının (ITFC) məqsədi özəl sektorun, xüsusən kiçik və orta sahibkarlığın idxal-ixrac imkanlarını artırmaqdır: "Qlobal idxal-ixrac zəncirinə qoşulmaq - başqa bir ölkədən hansısa avadanlıq almaq və yaxud hansısa bir ölkəyə nə isə satmaq baxımından qısa-orta müddətli maliyyələşmə layihələrimiz var".

ICD rəsmisi qeyd edib ki, İslam İnkişaf Bankı Qrupunun bu il Bakıda keçirilən illik toplantısı regional konnektiviti (əlaqəlilik) və loqistika mövzuları ətrafındadır: "Bilirik ki, Azərbaycan Orta Dəhlizdə, dünya ticarətində aktiv iştirakçıya çevrilmək istəyir. Geosiyasi vəziyyət də onu göstərdi ki, stabil, sabit coğrafi məkan yoxdur ki, bütün biznesini onun üzərindən aparasan. Bu isə Azərbaycan kimi ölkələrə yeni imkanlar açır ki, beynəlxalq investisiyalar cəlb etsin, beynəlxalq ticarətçilər çox strateji olan ölkəyə diqqət ayırsın. O baxımdan builki illik toplantımızda geosiyasi vəziyyəti iqtisadi uğura çevirmək barədə müzakirələr aparacağıq".

ICD Azərbaycanda əməkdaşlıq etdiyi bankların sayını artırmaq istəyir

Özəl Sektorun İnkişafı üzrə İslam Korporasiyası (ICD) daha bir neçə bankla əməkdaşlıqla bağlı danışıqlar aparır.

Bunu "Sizinxeber.az"a açıqlamasında qurumun Korporativ Strategiya və Tədqiqat bölməsinin meneceri Elvin Əfəndi bildirib.

Bununla belə, o, söhbətin hansı banklardan getdiyini açıqlamayıb (hazırda ICD-nin yerli tərəfdaşları "Rabitəbank" və "Turanbank" ASC-lərdir).

E.Əfəndi əlavə edib ki, Azərbaycanda İslam bankçılığının inkişafı ölkəmiz üçün böyük imkanlar aça bilər: "Bu gün Azərbaycanda tam işlək İslam maliyyəsi qanunvericiliyi yoxdur. Bu qanunvericiliyin formalaşdırılması üçün Azərbaycan Mərkəzi Bankının aktiv iştirakı ilə iş görülür. Biz, İslam İnkişaf Bankı Qrupu olaraq öz dəstəyimizi veririk, texniki yardımımızı göstəririk. Paralel olaraq, məsələn, "Sükuk" qanunvericiliyi ilə bağlı işlər gedir. Bu layihələrin hamısı sonda ona söykənir ki, İslam maliyyəsi üçün ölkədə qanunvericilik ekosistemi qurulsun. Bu, ölkəyə nə qazandıracaq? Təbii ki, insanların, sahibkarların, özəl sektorun alternativ İslam maliyyəsinə çıxış imkanı artır. Həmçinin ölkə üçün digər yaxın ölkələrdən investisiyaların gəlməsinə şərait yaranır. Körfəz ölkələri, İndoneziya kimi ölkələrdə böyük məbləğdə likvid kapital var. O kapitalı Azərbaycana investisiya eləmək üçün mütləq İslam maliyyəsi imkanları olmalıdır. Bu qanunvericilik olduqdan sonra isə həmin o maliyyələr özü təbii yolla bura axacaq".

Naxçıvan iqtisadiyyatına investisiya qoyuluşu 23 % artıb

Bu ilin yanvar-aprel aylarında Naxçıvan Muxtar Respublikasında əsas kapitala 60,9 milyon manat vəsait yönəldilib.

Bu barədə "Sizinxeber.az"un yerli bürosuna Naxçıvanın Nazirlər Kabinetindən bildirilib.

Məlumata görə, bu, ötən ilin eyni dövrü ilə müqayisədə 23,1 % çoxdur.

Ötən 4 ayda investisiya qoyuluşunun 35,3 %-i məhsul istehsalı sahələrinə, 17,4 %-i xidmət sahələrinə, 47,3 %-i isə yaşayış evlərinin tikintisinə sərf olunub.

Əsas kapitala vəsait qoyuluşunun 52,2 milyon manatı və yaxud 85,7 %-i tikinti-quraşdırma işlərinin payına düşmüşdür ki, bu da 1 il əvvələ nisbətən 62,2 % çoxdur.

Xatırladaq ki, bu ilin yanvar-aprel aylarında Azərbaycanda əsas kapitala 5 milyard 275 milyon manat investisiya yönəldilib. Bu, ötən ilin eyni dövrü ilə müqayisədə real ifadədə 2,6 % çoxdur.

Bununla belə, son 1 ildə qeyri-neft-qaz sektoruna investisiya qoyuluşu 12,4 % azalaraq 3 milyard 211,9 milyon manat təşkil edib.

Hesabat dövründə əsas kapitala yönəldilmiş investisiyalar məhsul istehsalı sahələri üzrə real ifadədə 19,9 % artaraq 3 milyard 138,2 milyon manat, xidmət sahələri üzrə real ifadədə 13,8 % azalaraq 1 milyard 420,4 milyon manat, yaşayış evlərinin tikintisinə yönəldilmiş investisiyalar isə real ifadədə 18,3 % azalaraq 716,4 milyon manat olub.

Naxçıvanda bank əmanətləri 47 %-dən çox artıb

Bu il mayn 1-nə Naxçıvan Muxtar Respublikasında əhalinin banklarda 41,4 milyon manat əmanəti olub.

Bu barədə "Report"un yerli bürosuna Naxçıvanın Dövlət Statistika Komitəsindən bildirilib.

Məlumata görə, bu, ötən il mayın 1-nə nisbətən 47,3 % çoxdur.

Əmanətlərin 94 %-i milli, 6 %-i xarici valyutada qoyulub. Ötən ilin eyni dövrü ilə müqayisədə milli valyutada olan əmanətlərin məbləği 47,7 %, xarici valyutada qoyulmuş əmanətlərin məbləği isə 40,4 % artıb.

Azərbaycan Qiymətli Kağızlar üzrə Komissiyaların Beynəlxalq Təşkilatının yığıncağında təmsil olunub

Azərbaycan Qiymətli Kağızlar üzrə Komissiyaların Beynəlxalq Təşkilatının (IOSCO) illik toplantısı çərçivəsində təşkilatın Avropa Regional Komitəsinin (ERC) onlayn formatda illik yığıncağında təmsil olunub.

"Sizinxeber.az" bu barədə Azərbaycan Mərkəzi Bankına (AMB) istinadən xəbər verir.

Məlumata görə, IOSCO İdarə Heyətinin sədri Jan Pol Servaisin sədrlik etdiyi yığıncaqda region üzrə 50-dən çox qiymətli kağızlar bazarı üzrə tənzimləyici qurumundan 100 nümayəndə iştirak edib. Tədbirdə AMB-nin sədr müavini Əli Əhmədov cari geosiyasi hadisələrin beynəlxalq maliyyə bazarlarında yaratdığı volatilliyin yerli kapital bazarlarına təsiri mövzusunda çıxış edib.

Komitə üzvləri qiymətli kağızlar bazarlarında dayanıqlılığın təmin edilməsi sahəsində yeniliklər barədə fikir mübadiləsi aparıb, investorların müdafiəsi və nəzarət üzrə beynəlxalq əməkdaşlığının gücləndirilməsi yollarını müzakirə ediblər.

Bundan əlavə, iştirakçılara IOSCO-nun 2026-cı il üzrə iş planının icrası barədə məlumat verilib, eləcə də tənzimləyici yanaşmalar arasında uyğunluğun təşviqində təşkilatın rolu vurğulanıb.

Naxçıvan iqtisadiyyatı 4 %-ə yaxın böyüyüb

Bu ilin yanvar-aprel aylarında Naxçıvan Muxtar Respublikasında 514,2 milyon manat dəyərində ümumi daxili məhsul istehsal (ÜDM) olunub.

Bu barədə "Sizinxeber.az"un yerli bürosuna Naxçıvanın Dövlət Statistika Komitəsindən bildirilib.

Məlumata görə, bu, ötən ilin eyni dövrü ilə müqayisəsə 3,7 % çoxdur.

Son 1 ildə muxtar respublikada adambaşına düşən ÜDM-in dəyəri isə 3,4 % artaraq 1 088 manat təşkil edib.

Xatırladaq ki, yanvar-aprel aylarında Azərbaycanda 39 milyard 875,1 milyon manatlıq ümumi daxili məhsul (ÜDM) istehsal olunub. Bu, ötən ilin eyni dövrünə nisbətən 0,2 % çoxdur.

O cümlədən, son 1 ildə ölkənin neft-qaz ÜDM-nin dəyəri 0,9 % azalaraq 12 milyard 135 milyon manata düşüb, qeyri-neft-qaz ÜDM-nin dəyəri isə 0,7 % artaraq 27 milyad 740,1 milyon manata çatıb.

Naxçıvanda əhaliyə göstərilən ödənişli xidmətlərin ümumi dəyəri 9 % azalıb

Bu ilin yanvar-aprel aylarında Naxçıvan Muxtar Respublikasında əhaliyə göstərilən ödənişli xidmətlərin ümumi dəyəri 70,8 milyon manat təşkil edib.

Bu barədə "Sizinxeber.az"un yerli bürosuna Naxçıvanın Dövlət Statistika Komitəsindən bildirilib.

Məlumata görə, bu, ötən ilin eyni dövrü ilə müqayisədə 9 % azdır.

Azərbaycan gələn il neft-qaz sektorunda azalmanın dayanacağını proqnozlaşdırır

Azərbaycan hökuməti 2027-ci ildə neft-qaz sektoru üzrə ümumi daxili məhsulda (ÜDM) azalmanın dayanacağını, 2026-cı illə müqayisədə sektorda istehsalın sabit qalacağını proqnzlaşdırır.

"Sizinxeber.az" xəbər verir ki, bu barədə Azərbaycan Mərkəzi Bankının (AMB) rüblük "Pul Siyasəti İcmalı"nda bildirilir.

Bu il isə hökumət neft-qaz sektorunda 3,3 % iqtisadi azalma gözləyir.

"2026 və 2027-ci illər üzrə qeyri-neftqaz sektorunda iqtisadi artım proqnozunun reallaşması, əsasən, daxili və xarici məcmu tələbin dinamikasından asılı olacaq", - deyə icmalda qeyd olunub.