Azərbaycanda ortamüddətli fiskal konsolidasiyanın aparılması nəsillərarası bərabərliyin qorunması və xarici dayanıqlığın möhkəmləndirilməsi baxımından hələ də məqsədəuyğun hesab olunur.

"Report" Beynəlxalq Valyuta Fondunun (IMF) hesabatına istinadən xəbər verir ki, qeyri-neft sahəsi üzrə ilkin balansın (NOPD) qeyri-neft ümumi daxili məhsulun (ÜDM) 6-6,5 % səviyyəsində kəsirə endirilməsi gələcək nəsillər üçün real annuitetin sabit həcminin saxlanılmasına şərait yaradardı.

"Bu hədəfə təqribən 10 illik müddət ərzində çatmaq üçün 2026-cı ildən etibarən hər il qeyri-neft ÜDM-nin 1,2-1,6 %-i miqdarında fiskal tənzimləmələrin həyata keçirilməsi zəruridir. Konsolidasiyanın bu cür sürəti hökumətin təsdiqlədiyi və 2029-cu ilədək hədəf göstəricinin qeyri-neft ÜDM-nin 13 %-i səviyyəsinə çatdırılmasını nəzərdə tutan sərt fiskal qaydaya uyğundur", - hesabatda vurğulanıb.

Eyni zamanda, IMF mütəxəssisləri bu qiymətləndirmələrin ciddi qeyri-müəyyənliklərə məruz qaldığını bildiriblər.

"Belə konsolidasiya tempinin tətbiqi onu göstərir ki, karbohidrogen qiymətlərinin büdcə proqnozlarında və ortamüddətli vergi-büdcə siyasətində gözləniləndən yuxarı olması sayəsində formalaşan əlavə gəlirlər yığım fonduna yönləndiriləcək. Dövlət borcunun ÜDM-ə nisbətinin mövcud aşağı səviyyəsi ilə yanaşı, nəzərdə tutulan konsolidasiya ümumi suveren stress riskinin azaldılmasına və xarici dayanıqlığın təmin olunmasına töhfə verəcək", - hesabatda bildirilib.

Oxşar xəbərlər

IMF: Azərbaycanın 2025-ci ildə fiskal siyasətinin yumşaldılması məqsədəuyğun deyil

Azərbaycan icmal büdcənin qeyri-neft baza kəsirinin qeyri-neft ÜDM-nə nisbəti üzrə proqnoz açıqlayıb

Fitch: 2025-ci ildə gözlənilən büdcə kəsirinə baxmayaraq, Azərbaycanın fiskal buferləri güclü olaraq qalır

Vüqar Bayramov: "Büdcə zərfində fiskal risklərin qeyd edilməsi məqsədəuyğun olardı"

Azərbaycan yaxın 5 ildə icmal büdcənin qeyri-neft baza kəsirinin qeyri-neft ÜDM-nə nisbətini 11 %-ə endirəcək