Azərbaycanda maliyyə xidməti kanalları bütün iqtisadi rayonlarda mövcud olacaq

Azərbaycanda maliyyə xidməti kanallarının bütün iqtisadi rayonlarda mövcudluğunun təmin edilməsi nəzərdə tutulur.

"Sizinxeber.az" xəbər verir ki, bu, Prezident İlham Əliyevin təsdiq etdiyi "Maliyyə inklüzivliyinin genişləndirilməsinə dair 2027–2030-cu illər üçün Dövlət Proqramı"nda öz əksini tapıb.

Sənədə əsasən, bu məqsədlə hər 100 000 yetkin (15+) nəfərə düşən POS-terminalların sayının 2 400-ə çatdırılması (2025-ci ildə 2 262), hər 100 000 yetkin (15+) nəfərə düşən bankomatların sayının 46-ya çatdırılması (2025-ci ildə 43,9) hədəflənir.

Bundan başqa, maliyyə məhsul və xidmətlərinin genişləndirilməsi sahəsində müddətli əmanət hesabı olan unikal yetkinlik yaşına çatmış əhalinin (15+) payının 2,8 %-ə çatdırılması (2025-ci ildə 2,4 %), tam və qismən təminatlı kreditlərin cəmi kreditlərdə payının 72 %-ə endirilməsi (2025-ci ildə 75 %) planlaşdırılır.