"AccessBank", "AmCham Azerbaijan" və "Neurotime" süni intellekt hakatonunun qaliblərini elan edib

Azərbaycanda Amerika Ticarət Palatasının ("AmCham Azerbaijan") təşkilatçılığı, "AccessBank" və "Neurotime" tərəfdaşlığı ilə keçirilən "Building with AI: From Idea to Working Product" birgünlük innovasiya hakatonu uğurla başa çatıb.

23 may 2026-cı il tarixində keçirilən hakatona iştirak üçün 600-dən çox müraciət daxil olub. Müraciətlər arasından seçilən 60 iştirakçı süni intellekt texnologiyalarından istifadə etməklə öz ideyalarını qısa müddət ərzində işlək məhsul və prototiplərə çevirmək imkanı əldə edib.

Hakaton çərçivəsində iştirakçılar komandalar şəklində çalışaraq "ChatGPT", "Claude", "Cursor", "Lovable", "Replit", "Zapier", müxtəlif API-lər və digər müasir AI platformalarından istifadə etməklə innovativ həllər hazırlayıb və günün sonunda münsiflər heyəti qarşısında təqdim ediblər. Komandalar proses boyunca təcrübəli mentorların dəstəyi ilə təmin olunub.

Münsiflər heyətinin qiymətləndirməsinə əsasən hakatonun qalibləri aşağıdakı komandalar olub:

• I yer - Rufina Rəhimli, İbrahim Hüseynov, Nuray Qasımzadə

• II yer - Emil Qallacov, Məhəmməd Babayev

• III yer - Elçin Yusubov, İmran Hacıyev, Hüseyn Həsənzadə

Qeyd edək ki, "Building with AI: From Idea to Working Product" hakatonunun ümumi mükafat fondu 5 000 AZN təşkil edib. Qaliblərə aşağıdakı məbləğlərdə pul mükafatları təqdim olunub:

• I yer - 2 500 AZN

• II yer - 1 500 AZN

• III yer - 1 000 AZN

Hakatonun əsas məqsədi Azərbaycanda süni intellekt və innovasiya ekosisteminin inkişafına töhfə vermək, gənclərin və texnologiya həvəskarlarının praktiki bacarıqlarını artırmaq, eləcə də innovativ məhsulların yaranmasını təşviq etmək olub. Tədbir iştirakçılar üçün həm öyrənmək, həm də şəbəkələşmək baxımından mühüm platforma rolunu oynayıb.