AQTA Ukraynanın istehsalçı şirkətinə qoyduğu məhdudiyyəti aradan qaldırıb

Ukraynanın istehsalçı şirkətlərdən birinə məxsus dondurulmuş mal əti məhsulunda aşkarlanmış uyğunsuzluqla əlaqədar Azərbaycan Qida Təhlükəsizliyi Agentliyi (AQTA) idxalla bağlı qoyduğu müvəqqəti məhdudiyyəti aradan qaldırıb.

"Sizinxeber.az" xəbər verir ki, bu barədə AQTA məlumat yayıb.

AQTA-nın bildirişi əsasında, Ukraynanın Qida Təhlükəsizliyi və İstehlakçıların Hüquqlarının Müdafiəsi Dövlət Xidməti tərəfindən istehsalçı müəssisədə baytarlıq nəzarəti tədbirləri və laborator müayinələr aparılıb.

Görülmüş müvafiq sağlamlaşdırma tədbirləri və epizootoloji monitorinqlərlə bağlı Agentliyə ətraflı məlumat verilib.

Ukrayna tərəfindən baytarlıq norma və qaydalarına, həmçinin qarşılıqlı idxal-ixrac əməliyyatları ilə bağlı müvafiq tələblərə əməl olunacağına dair zəmanətin verilməsi nəzərə alınaraq sözügedən istehsalçının respublikamıza məhsul idxalına qoyulmuş müvəqqəti məhdudiyyət aradan qaldırılıb. AQTA-nın qərarı ilə bağlı Ukraynanın səlahiyyətli qurumuna müvafiq məlumat verilib.

ICMP Azərbaycanda itkin düşmüş şəxslərin taleyinin aydınlaşdırılmasını dəstəkləməyə hazırdır

Səhiyyə Nazirliyində Azərbaycanda səfərdə olan İtkin Düşmüş Şəxslər üzrə Beynəlxalq Komissiyanın (ICMP) Baş direktoru Katrin Bombergerin rəhbərlik etdiyi nümayəndə heyəti ilə görüş keçirilib.

Bu barədə "Report"a Səhiyyə Nazirliyindən məlumat verilib.

Görüşdə məhkəmə-tibb ekspertizası, DNT analizləri, laborator imkanların gücləndirilməsi, mütəxəssis hazırlığı və bilik mübadiləsi istiqamətlərində əməkdaşlığın inkişaf perspektivləri müzakirə edilib.

Bildirilib ki, itkin düşmüş şəxslərin axtarışı, şəxsiyyətinin müəyyənləşdirilməsi və bu sahədə müasir elmi yanaşmaların tətbiqi humanitar baxımdan xüsusi əhəmiyyət daşıyır. Qeyd olunub ki, beynəlxalq təcrübənin öyrənilməsi və innovativ metodların tətbiqi görülən işlərin səmərəliliyinin artırılmasına xidmət edir.

Səhiyyə naziri Teymur Musayev işğaldan azad edilmiş ərazilərdə aparılan axtarış işləri və aşkarlanan insan qalıqlarının identifikasiyası prosesində aidiyyəti dövlət qurumlarının əlaqəli və koordinasiyalı fəaliyyət göstərdiyini bildirib. Nazir ICMP ilə əməkdaşlığın bu istiqamətdə mühüm töhfə verdiyini vurğulayıb.

ICMP-nin Baş direktoru K. Bomberger Azərbaycanda itkin düşmüş şəxslərin taleyinin aydınlaşdırılması istiqamətində görülən işləri yüksək qiymətləndirərək, rəhbərlik etdiyi təşkilatın gələcəkdə də ölkəyə texniki və ekspert dəstəyi göstərməyə hazır olduğunu deyib.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb, gələcək əməkdaşlıq perspektivəri nəzərdən keçirilib.

TƏBİB Yevlax Regional Xəstəxanasında kassa aparatlarının olmaması ilə bağlı açıqlama verib

Tibbi Ərazi Bölmələrini İdarəetmə Birliyi (TƏBİB) Ağciyər Xəstəlikləri Mərkəzinin nəzdində olan Yevlax Regional Xəstəxanasında kassa aparatları və ödəniş pos-terminallarının olmamasına münasibət bildirib.

"Report"un sorğusuna cavab olaraq qurumdan bildirilib ki, xəstəxananın fevralın 13-də yenidənqurma işlərindən sonra açılışı olub.

Qeyd olunub ki, Ağciyər Xəstəlikləri Mərkəzi ilə Yevlax Rayon Mərkəzi Xəstəxanası arasında müəssisənin əmlakının təhvil-təslim işləri aparılıb.

Əmlakın Mərkəzin balansına verilməsi üçün İqtisadiyyat Nazirliyi yanında Əmlak Məsələləri Dövlət Xidmətinin Daşınmaz Əmlakın Dövlət Kadastrı və Reyestrinə müraciət olunub, müvafiq işlərin görülməsinə başlanılıb.

Məlumata görə, hazırda icbari tibbi sığortanın Xidmətlər Zərfinə daxil olmayan tibbi xidmətlər üzrə müvafiq dövlət ödənişlərinin olunması şərtilə vətəndaşlara xidmət göstərilir. Xidmət keyfiyyətinin və vətəndaş məmnuniyyətinin artırılması, əlçatanlığın təmin olunması məqsədilə nəzarət kassa aparatlarının, banka məxsus ödəniş pos-terminallarının və ödəniş kassa aparatlarının təmin olunması üçün müəyyən ödəniş limitlərinin olması, habelə dövlət vergi orqanlarında obyekt uçot kodunun olması tələbləri qoyulub. Bu istiqamətdə aidiyyəti üzrə dövlət qurumları ilə rəsmi danışıqlar davam etdirilir.

Proses yekunlaşdıqdan sonra Yevlax Regional Xəstəxanası müvafiq qaydada nəzarət kassa aparatları və ödəniş pos-terminalları ilə təmin ediləcək.

Xatırladaq ki, sosial şəbəkələrdə sözügedən xəstəxanada kassa aparatları və ödəniş pos-terminallarının olmamasına dair iddialar yayılıb.

Aşura günü ilə bağlı qanvermə aksiyasında 486 nəfər qan verib

Bu gün səhər saat 10:00-a olan məlumata görə, 486 nəfər qanvermə aksiyasında iştirak edib.

"Sizinxeber.az" xəbər verir ki, bunu Səhiyyə Nazirliyi Respublika Qan Bankının icraçı direktoru Elxan Nağıyev Təzəpir məscidində Aşura günü ilə əlaqədar təşkil olunan qanvermə aksiyası zamanı jurnalistlərə açıqlamasında deyib.

Onun sözlərinə görə, bu il də azad olunmuş ərazilərdə - Şuşa və Ağdam şəhərindəki məscidlərdə qanvermə aksiyası təşkil olunub:

"Ümumilikdə ölkə üzrə 30 şəhər-rayon üzrə 40 müəssisədə bu aksiya həyata keçirilir. Onlardan 24-ü məscid və ziyarətgah, 15-i tibb məntəqəsi, 1-i isə təhsil müəssisədir".

İcraçı direktor bildirib ki, aksiya saat 16:00-dək davam edəcək.

İlahiyyat İnstitutunda qanvermə aksiyası keçirilir

Azərbaycan İlahiyyat İnstitutunda Aşura günü ilə bağlı qanvermə aksiyası keçirilir.

"Report" xəbər verir ki, aksiya Dini Qurumlarla İş üzrə Dövlət Komitəsi, Səhiyyə Nazirliyi, Qafqaz Müsəlmanları İdarəsi, Gənclər Fondu, Tibbi Ərazi Bölmələrini İdarəetmə Birliyi, Respublika Qan Bankı, Azərbaycan Həmkarlar İttifaqları Konfederasiyası, Azərbaycan İlahiyyat İnstitutu, Mənəvi Dəyərlərin Təbliği Fondu, Bakı İlahiyyat Kolleci, Azərbaycan Milli QHT Forumu, Azərbaycan Qızıl Aypara Cəmiyyəti və Azərbaycan Könüllü Təşkilatları İttifaqının birgə təşkilatçılığı ilə keçirilir.

Aksiyada dövlət rəsmiləri, qeyri-hökumət təşkilatlarının üzvləri, eləcə də müxtəlif dövlət qurumlarını təmsil edən 100-dək könüllü və ictimaiyyət nümayəndələri iştirak edirlər.

Qanvermə aksiyasının keçirilməsində əsas məqsəd Aşura ilə bağlı bəzi yanlış təsəvvür və adətlərin aradan qaldırılmasına, bu günün mahiyyətinin düzgün izahına, dini mərasimlərin xeyirxahlıq, yardımlaşma, insanpərvərlik dəyərləri əsasında təşviqinə töhfə vermək, eyni zamanda sosial məsuliyyət hissini gücləndirməkdir.

Aksiya zamanı toplanan qan hemofiliya və talassemiya, həmçinin digər xəstəliklərdən əziyyət çəkən insanların müalicəsində istifadə olunacaq.

Alimlər antibiotiklərdən tez-tez istifadənin təhlükəsi barədə xəbərdarlıq ediblər

"Təhlükəsizlik üçün" antibiotik təyin etmək vərdişi dərmana davamlı bakteriyaların yayılmasını sürətləndirə bilər.

"Sizinxeber.az" xəbər verir ki, bununla bağlı elmi işin nəticələri "Clinical Microbiology and Infection (CMI)" jurnalında dərc olunub.

Müəlliflər qeyd edirlər ki, antibiotiklərin profilaktik istifadəsi bəzən həqiqətən həyatı xilas edir, lakin son illər bu cür dərmanlar getdikcə təsdiqlənmiş bakterial infeksiyası olmayan insanlara təyin edilir. Alimlərin fikrincə, bu, bədənin mikroflorasına güclü təzyiq göstərir və müalicəyə cavab verməyən bakteriyaların ortaya çıxmasına kömək edir.

Məqalədə antibiotiklərin profilaktik olaraq istifadə edildiyi bir neçə ümumi vəziyyət nəzərdən keçirilir. Bunların arasında viral sətəlcəm üçün dərmanların təyin edilməsi, bəzi infeksiyalara yoluxma riskindən sonra doksisiklinin istifadəsi, bağırsaq infeksiyalarının qarşısının alınması və streptokok infeksiyası olanlarla təmasda olan insanların müalicəsi var.

Bir nümunədə, xəstəliyin yalnız bir halının qarşısını almaq üçün təxminən 580 sağlam insana antibiotik təyin edilməli idi.

Tədqiqatçılar hesab edirlər ki, tibb ictimaiyyəti bu cür praktikaya yanaşmanı yenidən nəzərdən keçirməlidir. "Daha yaxşısı əvvəldən təhlükəsiz olmaqdır" prinsipi əvəzinə müəlliflər antibiotikləri yalnız faydaların güclü sübutları olduqda, dar spektrli dərmanlara və minimum tələb olunan müalicə müddətinə üstünlük verərək təyin etməyi təklif edirlər.

Alimlərin fikrincə, bakteriyaların antibiotiklərə qarşı müqaviməti artıq səhiyyə üçün ən böyük təhdidlərdən birinə çevrilib. Buna görə mövcud dərmanların effektivliyinin qorunması yeni preparatların inkişafından daha vacib ola bilər.

"Avromed Company" MMC sağlam həyat tərzi və xeyriyyəçilik təşəbbüslərinə dəstəyini davam etdirir

Ölkənin aparıcı farmasept şirkətlərindən olan "Avromed Company" MMC, korporativ sosial məsuliyyət strategiyasına sadiq qalaraq, cəmiyyətdə sağlam həyat tərzinin təbliği və sosial rifahın yüksəldilməsinə yönəlmiş genişmiqyaslı layihələrə dəstəyini uğurla davam etdirir. Şirkət sözügedən missiyanın davamı olaraq, Qusar rayonunda keçirilən "Zirvəyə doğru qaçış" kütləvi atletika yarışının rəsmi tərəfdaşı qismində çıxış edib.

Gənclər və İdman Nazirliyi, Qusar Rayon İcra Hakimiyyəti və Azərbaycan Atletika Federasiyasının birgə təşəbbüsü ilə təşkil olunan yarış 800-dən çox iştirakçını bir araya gətirib. İştirakçılar üçün xüsusi olaraq müəyyən edilmiş 11 kilometrlik marşrut üzrə keçirilən gərgin və maraqlı mübarizədə həvəskar atletlər öz dözümlülük və hazırlıq səviyyələrini nümayiş etdiriblər.

Yarışın əsas tərəfdaşlarından olan "Avromed Company" MMC-nin tərəfindən müxtəlif yaş kateqoriyaları üzrə qaliblərə xüsusi hədiyyələr təqdim olunub.

"Avromed Company" MMC-nin tərəfdaşı olduğu "Zirvəyə doğru qaçış" layihəsi sadəcə idman yarışı deyil, həm də mühüm xeyriyyə xarakteri daşıyan sosial bir təşəbbüsdür. Yarışın təşkilindən və qeydiyyatdan əldə olunan bütün vəsait birbaşa sosial və humanitar məqsədlərə ianə edilib.

Cəmiyyətin sağlamlığına yönələn layihələri diqqətdə saxlayan "Avromed", sosial məsuliyyət strategiyasının bir hissəsi olaraq bu tipli təşəbbüslərə dəstəyini növbəti mərhələlərdə də davam etdirəcək.

Qeyd edək ki, 2002-ci ildən fəaliyyət göstərən "Avromed Company" MMC Azərbaycanda əczaçılıq sektorunun inkişafına töhfə verən aparıcı distribüter şirkətlərdən biridir. Şirkət dünyanın 40-dan çox ölkəsindən 200-dən artıq tədarükçü ilə əməkdaşlıq edir və ölkə üzrə aptek, klinika və xəstəxanaları fasiləsiz olaraq sağlamlıq məhsulları ilə təmin edir. "Avromed" müasir logistika şəbəkəsi və keyfiyyətli məhsulları ilə bazarda etibarlı lider kimi tanınır.

AQTA: Mağazalardakı bir qəpiklik yumurtalarda uyğunsuzluq aşkarlanmayıb

Mağazalardakı bir qəpiklik yumurtalarda uyğunsuzluq aşkarlanmayıb.

Bu barədə "Sizinxeber.az"un sorğusuna cavab olaraq Azərbaycan Qida Təhlükəsizliyi Agentliyindən (AQTA) məlumat verilib.

Bildirilib ki, ərzaqlıq yumurtaların keyfiyyət və təhlükəsizlik göstəriciləri üzrə daimi olaraq monitorinq və yoxlama nəzarət tədbirləri aparılır. Yoxlamalar zamanı uyğunsuzluq aşkarlanmayıb. Məhsullar baytarlıq arayışı və ekspertiza aktları ilə təmin olunub.

Qeyd edək ki, sosial şəbəkələrdə mağazalarda bir qəpiyə satışa çıxarılan yumurtaların keyfiyyətsiz olduğu ilə bağlı iddialar yayılıb.

Alimlər ən təhlükəli uşaq xərçəngi növlərindən birinə qarşı vaksin hazırlayıblar

İrlandiyalı alimlər uşaqlarda ən ölümcül onkoloji xəstəliklərdən biri olan neyroblastomaya qarşı yeni "mRNT" vaksininin sınaqlarının ilk uğurlu nəticələri barədə məlumat veriblər.

"Sizinxeber.az" xəbər verir ki, tədqiqatın nəticələri "Molecular Therapy Oncology" (MTO) jurnalında dərc olunub.

Uşaq xərçəngindən ölümlərin təxminən 15 faizi neyroblastomanın payına düşür və bir çox xəstə mövcud müalicə üsullarına pis reaksiya verir. Tədqiqatçılar immun sisteminə şiş hüceyrələrini tanımağa və onlara hücum etməyə kömək edən "mRNT" əsaslı vaksin yaradıblar. Preparatın çatdırılması üçün xüsusi öz-özünə yığılan peptid nanohissəciklərdən istifadə olunub.

İlkin təcrübələrdə yeni vaksin ümidverici nəticələr göstərib. O, şişin inkişafını 10-11 gün yavaşıdıb və ölçüsünü təxminən 70 faiz azaldıb. İmmun sistemi üçün hədəf neyroblastoma hüceyrələrinin səthində böyük miqdarda mövcud olan "Glypican 2" zülalı olub.

Müəlliflər qeyd edirlər ki, texnologiyanın faydası yalnız neyroblastoma ilə məhdudlaşmaya bilər. "Glypican 2" zülalına bəzi digər xərçəng növlərində də rast gəlinir, buna görə də gələcəkdə bu yanaşmanı müxtəlif şişlərin müalicəsi üçün potensial olaraq uyğunlaşdırmaq mümkündür.

GEROPHARM şəkərli diabetin 2-ci tipi və piylənmənin müalicəsi üçün nəzərdə tutulan preparatlara "Halal" sertifikatı alıb

GEROPHARM şirkətinin Sejaro (tirzepatid), Semavic (semaqlutid) və Semavic Next (semaqlutid) preparatları islam normalarına uyğunluğunu təsdiqləyən "Halal" sertifikatı alıb.

Preparatlar GLP-1 reseptor agonistləri sinfinə aiddir. Şəkərli diabetin 2-ci tipinin və piylənmənin müalicəsində istifadə olunur. Preparatlar artıq Azərbaycan bazarında mövcuddur və təsdiq edilmiş göstərişlərə uyğun olaraq həkim təyinatı ilə apteklərdə əldə edilə bilər.

Sertifikat Beynəlxalq "Halal" Standartlaşdırma və Sertifikatlaşdırma Mərkəzi tərəfindən təqdim edilib. İstehsal prosesi islam normalarının tələblərinə tam uyğunlaşır.

"Halal" statusu dərman vasitələrinə yalnız tərkib və istehsal texnologiyası hərtərəfli yoxlanıldıqdan sonra verilir. Bu o deməkdir ki, preparatların tərkibində etanol, qan, donuz mənşəli hüceyrə və toxumalar, eləcə də islam normalarına uyğun olmayan digər komponentlər mövcud deyil.

Azərbaycanda məhsulların islam normalarına uyğunluğu bir çox istehlakçı üçün mühüm amil hesab olunur. Bu baxımdan "Halal" sertifikatının mövcudluğu pasiyentlərə terapiya seçərkən əlavə əminlik yaradır. Bu, şəkərli diabetin 2-ci tipi və piylənmənin müalicəsində yalnız tibbi göstəriciləri deyil, həm də pasiyentlərin şəxsi inanclarını nəzərə almağa imkan verir.

Şəkərli diabet və piylənmənin yayılmasının artdığı bir dövrdə islam normalarına uyğun innovativ preparatların əlçatanlığı səhiyyədə daha pasiyentyönümlü yanaşmanın inkişafına töhfə verir.

Daha əvvəl GEROPHARM insulin preparatları xətti üçün də "Halal" sertifikatı əldə etmişdi. GLP-1 sinfinə aid preparatlar üçün sertifikatın alınması şirkətin islam normalarına riayət edən pasiyentlər üçün müasir müalicə imkanlarının əlçatanlığını genişləndirmək istiqamətində atdığı növbəti addımdır.

"Pasiyentə qayğı onun həyat tərzinə və inanclarına hörmətlə başlayır. Buna görə də bizim üçün Sejaro, Semavic və Semavic Next preparatlarının islamın ən ciddi tələblərinə uyğunluğunu təsdiqləmək prinsipial əhəmiyyət daşıyırdı. "Halal" statusu hər bir pasiyentə diqqətli və dürüst münasibətimizin təminatıdır", - deyə GEROPHARM şirkətinin baş direktoru Pyotr Rodionov bildirib.

GEROPHARM GxP standartlarına uyğun fəaliyyət göstərən beynəlxalq biotexnoloji preparatlar istehsalçısıdır. Şirkət nevrologiya, endokrinologiya, oftalmologiya, ginekologiya və urologiya kimi tibb sahələrində istifadə olunan preparatların istehsalı ilə məşğuldur. Məhsullar dünyanın 14 ölkəsində tibb mütəxəssisləri tərəfindən etibarlı seçim kimi istifadə olunur.

Azərbaycan Respublikasında GEROPHARM 2014-cü ildən etibarən öz nümayəndəliyi vasitəsilə fəaliyyət göstərir, ölkənin tibb ictimaiyyəti və pasiyentləri ilə uzunmüddətli əməkdaşlığını inkişaf etdirir. Bu gün şirkət şəkərli diabet və piylənmənin müalicəsi istiqamətində fəaliyyətini davam etdirir, pasiyentlərin müasir biotexnoloji preparatlara çıxış imkanlarını genişləndirir.