Rektor: BDU-da milli-mənəvi dəyərlərin təbliği prosesinə xüsusi diqqət ayrılır

Təhsil innovativ texnologiyalar tətbiq edilməklə müasir tələblərə uyğunlaşmalı, yeni metodlarla zənginləşdirilməlidir.

"Sizinxeber.az" xəbər verir ki, bunu Bakı Dövlət Universitetinin rektoru Elçin Babayev “Ənənəvi dəyərlərin və ailə institutunun qorunması təhsil prosesində vacib amil kimi” mövzusunda keçirilən konfransda çıxışı zamanı deyib.

O qeyd edib ki,bütün bunlar milli-mənəvi dəyərlər bazası üzərində qurulmalıdır:

"Müasirlik, yüksək intellektual səviyyə, savadlılıq heç də milli-mənəvi dəyərlər sistemini inkar etmir. Tam əksinə, elmi biliklər, geniş dünyagörüşü milli ruhumuza, mənəvi dəyərlərimizə söykənməli, onların davamlı inkişafını təmin etməlidir. Bakı Dövlət Universitetində tələbələrə milli-mənəvi dəyərlərin təbliği prosesinə xüsusi diqqət ayrılır".