Vüsal Rüstəmov: “Bilim Bakı”da iki il ərzində 120 mindən çox məktəbli təlimlərdə iştirak edib

“Bilim Bakı" mərkəzində iki il ərzində 120 mindən çox paytaxt məktəblisi təlimlərdə iştirak edib.

"Sizinxeber.az"un Şimal bürosunun məlumatına görə, bunu "Bilim Quba" mərkəzinin açılış mərasimində iştirak edən "ASAN xidmət"in "İnnovasiyalar Mərkəzi"nin direktoru Vüsal Rüstəmov jurnalistlərə açıqlamasında deyib.

O, mərkəzdə təhsil alan şagirdlərin yerli və beynəlxalq olimpiadalarda yüksək nailiyyətlər əldə etdiklərini bildirib:

"Bilim Azərbaycan" layihəsi uğurla davam etdirilir. Əsas məqsəd 6-14 yaş qruplarında olan məktəblilərin elm, texnologiya və innovasiyalara marağının artırılmasıdır. Layihə çərçivəsində yaradılan "Bilim Bakı" mərkəzi artıq iki ildir fəaliyyət göstərir.

Bu dövr ərzində 120 mindən artıq paytaxt məktəblisi təlimlərdə iştirak edib. Mərkəzin şagirdləri yerli və beynəlxalq yarışlarda, həmçinin olimpiadalarda yüksək nailiyyətlər əldə ediblər. Bu layihəmiz bölgələrə doğru genişlənir".