Azərbaycanda rəqəmsallaşma şəhər həyatını daha rahat edir.

"Report" xəbər verir ki, bunu "Azərbaycan Tikinti Materialları İstehsalçıları Assosiasiyası" İctimai Birliyinin üzvü Orxan Çobanzadə Bakıda keçirilən Ümumdünya Şəhərsalma Forumu (WUF13) çərçivəsində təşkil olunmuş "Özəl sektor davamlı şəhərlərin inkişafının aparıcı qüvvəsi kimi" adlı tədbirdə bildirib.

Onun sözlərinə görə, ümumilikdə hər şey insan amilindən asılıdır: "Şəhərlərin inkişafında əsas faktor məhz insandır. Bu gün şəhərlərimizin həm tarixi memarlıq abidələri, həm də müasir tikililərlə inkişaf etməsini istəyiriksə, ilk növbədə insanların rahatlığı və yaşayış şəraiti nəzərə alınmalıdır. Bir şəhər salınarkən əvvəlcə düşünülməlidir ki, insanlar burada necə yaşayacaq, onların gündəlik ehtiyacları necə qarşılanacaq. Bunun üçün infrastruktur düzgün planlaşdırılmalı, xidmət səviyyəsi yüksək olmalıdır. Eyni zamanda nəqliyyat sistemi, şəhər daxilində əlçatanlıq, marketlərə, restoranlara, banklara və digər xidmət sahələrinə yaxınlıq kimi məsələlər diqqətdə saxlanılmalıdır".

"Azərbaycanda son illərdə bu istiqamətdə ciddi inkişaf müşahidə olunur. Xüsusilə rəqəmsallaşma, innovasiya sahəsində mühüm addımlar atılır. Günel xanımın da vurğuladığı kimi, "ASAN xidmət" modeli bu sahədə uğurlu nümunələrdən biridir. O, əvvəlki dövrlərlə müqayisədə daha innovativ yanaşmalar tətbiq edir və bir çox xidmətləri rəqəmsallaşdıraraq insanların işini xeyli asanlaşdırır", - deyə O.Çobanzada əlavə edib.

Oxşar xəbərlər

Günel Ələsgərova: "Ağıllı sistem"lər və eko-materiallar şəhər həyatını dəyişir"

Assosiasiya: "Ağıllı nəqliyyat" urbanizasiya problemini azaltmağa kömək edir

AAYDA: Şəhərlərin rəqabət qabiliyyəti tikinti həcmləri ilə ölçülmür

Read Qasımov: "WUF13 Azərbaycanın şəhər inkişafına innovativ yanaşmalara bağlılığını əks etdirir"

Orxan Məmmədov: "WUF13 özəl sektor üçün yeni əməkdaşlıq imkanları yaradır"