"Ağıllı nəqliyyat" sistemləri urbanizasiya problemlərini azaltmağa kömək edir.

"Sizinxeber.az" xəbər verir ki, bunu "Azərbaycan Tikinti Materialları İstehsalçıları Assosiasiyası" İctimai Birliyinin üzvü Günel Ələsgərova Bakıda keçirilən Ümumdünya Şəhərsalma Forumu (WUF13) çərçivəsində təşkil olunmuş "Özəl sektor davamlı şəhərlərin inkişafının aparıcı qüvvəsi kimi" adlı tədbirdə bildirib.

Onun sözlərinə görə, hazırda Azərbaycan şəhərləri əvvəlki dövrlərlə müqayisədə daha planlı, uyğunlaşdırılmış və inkişaf etmiş formada layihələndirilərək tikilir: "Bu yanaşmanı həm ağıllı sistemlərin tətbiqində, həm də dayanıqlı yol infrastrukturlarının qurulmasında müşahidə edirik. Əvvəlki layihələrdə əsas diqqət daha çox tikintiyə yönəlirdisə, indi yaşıllaşdırma, ekologiya və insanların rahatlığı prioritet məsələlərdən birinə çevrilib. Müasir parklar, yollar və nəqliyyat bağlantılarında artıq daha ağıllı sistemlər tətbiq olunur. Azərbaycanda fəaliyyət göstərən ASAN xidmət və intellektual nəqliyyat idarəetmə sistemi buna nümunədir. Bu sistemlər yolların real vaxt rejimində idarə olunmasına, həmçinin tikililər və nəqliyyat infrastrukturu arasında əlaqələrin daha səmərəli qurulmasına imkan yaradır".

"Özəl sektorun fəaliyyətində də yaşıllaşdırılmış binalar, ərazisində parkların salındığı yaşayış kompleksləri və ekoloji yanaşmalar diqqət çəkir. Yeni layihələrdə təbii işıqlandırmadan istifadə, yağış sularının təkrar emalı və günəş panelləri vasitəsilə enerji sərfiyyatının azaldılması kimi həllər tətbiq olunur. Bununla yanaşı, özəl sektorda həyata keçirilən tikintilərdə yalnız maliyyə maraqlarının əsas götürülməsi düzgün yanaşma hesab olunmamalıdır. Çünki kommersiya maraqları üstünlük təşkil etdikdə insanların rahatlığı ikinci plana keçə bilər. Bu isə sistemli və ağıllı şəhərlərin formalaşmasına maneə yaradır. Məsələn, binaların həddindən artıq sıx tikilməsi nəqliyyat sıxlığına, piyadaların hərəkətində çətinliklərə və velosiped yollarının çatışmazlığına səbəb ola bilər. Hazırda şəhərlərdə velosiped yollarının, piyada zonalarının və ictimai nəqliyyatın daha rahat istifadəsinə yönəlmiş dəyişikliklər həyata keçirilir. Bütün bunlar urbanizasiyanın şəhərlərə mənfi təsirlərini azaltmağa və mövcud problemlərin qarşısını almağa xidmət edir", - deyə G.Ələsgərova əlavə edib.

Oxşar xəbərlər

Günel Ələsgərova: "Ağıllı sistem"lər və eko-materiallar şəhər həyatını dəyişir"

İcraçı direktor: Azad edilmiş ərazilərdə şəhərsalma yanaşmaları multikultural dəyərlərlə birləşdirilir

Emin Hüseynov: Azad edilmiş ərazilərdə "ağıllı şəhər", "ağıllı kənd" layihələri əsas yer tutur

UN-Habitat: Şəhərlər hazırki iqlim münaqişələrinin ön xəttindədir

WUF13-də "Təhlükəsiz qayıdış üçün ağıllı, dayanıqlı yaşayış məskənləri" təşəbbüsü təqdim olunub