Afrika şəhərlərində sürətli urbanizasiya fonunda qeyri-rəsmi yaşayış məntəqələrinin artması mənzil və infrastruktur sahəsində ciddi problemlər yaradır.

"Report" xəbər verir ki, bunu Anqola Memarlar Ordeninin Prezidenti Vity Nsalambi Ümumdünya Şəhərsalma Forumunun 13-cü sessiyası (WUF13) çərçivəsində keçirilən "Dayanıqlı İnkişaf Məqsədlərindən Mənzillərə" adlı tədbirdə deyib.

Onun sözlərinə görə, hazırda Afrikada ən sürətlə böyüyən şəhərlərin əhəmiyyətli hissəsi yerləşir: "Dünyada ən sürətlə böyüyən 10 şəhərdən ən azı 4-5-i Afrikadadır. Lakin gözəl görüntülərin arxasında böyük problemlər dayanır. Ruandada qeyri-rəsmi yaşayış məntəqələri şəhər ərazilərinin təxminən 70-75 %-ni təşkil edir. Bu vəziyyət infrastrukturun idarə olunmasına, mənzil təminatına və şəhər sakinlərinin həyat keyfiyyətinə ciddi təzyiq göstərir. Bir çox hallarda problemlərə "yuxarıdan aşağı" yanaşma ilə, idxal olunan və yüksək karbon emissiyası yaradan həllər tətbiq edilir. İnsanları dinləməli, onların ehtiyaclarını anlamalı və qərarvermə prosesinə cəlb etməliyik. Heç kəs bütün cəmiyyət adından düşünə bilməz".

O bildirib ki, təbiət əsaslı həllər və yerli materiallardan istifadə şəhər inkişafında mühüm rol oynaya bilər. Lakin bəzi icmalar yerli həllərdən daha çox xarici modellərə üstünlük verir: "Memarlar və şəhərsalma üzrə mütəxəssislər insanların yerli və dayanıqlı materialların əsl dəyərini anlaması üçün maarifləndirmə istiqamətində çalışmalıdırlar. Bir çox Afrika şəhərində idarəetmə strukturları yetərincə formalaşmayıb və icmaların potensialının artırılmasına ehtiyac var. İştirakçı planlaşdırma modeli tətbiq olunarsa, kiçik miqyaslı təşəbbüslər böyük nəticələr verə bilər".

Qonaq əlavə edib ki, memarlıq məktəblərində tədris olunan yanaşmalar çox vaxt şəhərlərin real ehtiyaclarına cavab vermir.

Oxşar xəbərlər

UN-Habitat-ın mütəxəssisi: Afrikada əhalinin yarıdan çoxu qeyri-rəsmi məskənlərdə ömür sürür

Nazir: Anqola dayanıqlı şəhər inkişafı üçün mənzil proqramlarını genişləndirir

Anaklaudia Rossbax: "Dünyada bir milyard insanın suya çıxış problemi qalmaqdadır"

UNDP rəsmisi: "Dayanıqlı mənzil layihələrinə daha çox investisiya yönəldilməlidir"

Braziliyalı alim: "Mənzil siyasəti təhlükəsiz yaşayış və həyat təminatı verməlidir"