İqlim dəyişiklikləri sülh və təhlükəsizlik risklərini artırır.

"Sizinxeber.az" xəbər verir ki, bunu BMT-nin Ətraf Mühit Proqramının məsləhətçisi Matti Lehtonen Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Daha təhlükəsiz və dayanıqlı şəhərlərin formalaşdırılması: Şəhər iqlimi, sülh və təhlükəsizlik üzrə siyasət sənədinin layihəsi"nin müzakirəsində bildirib.

"Əgər iqlim, sülh və təhlükəsizlik anlayışını eşitmisinizsə, çox güman ki, bunu iqlimin riskləri gücləndirən faktor kimi çıxış etməsi ilə əlaqələndirərsiniz. Bu da bizim İqlim Təhlükəsizliyi Mexanizmində (CSM) istifadə etdiyimiz əsas yanaşmadır. Lakin əslində bu anlayış daha genişdir. O, iqlim təzyiqləri və iqlim şokları ilə mövcud sülh və təhlükəsizlik dinamikaları, eləcə də sosial-iqtisadi sistemlər arasındakı qarşılıqlı təsirləri əhatə edir. Bu, mürəkkəb və çoxqatlı səbəb-nəticə zəncirləri olan kaskad təsirlər sistemidir. Bizim baxışımıza görə, burada birbaşa və sadə səbəb-nəticə əlaqəsi görmürük. Atmosfer hadisələrinin birbaşa olaraq insanların bir-birini öldürməsinə səbəb olduğunu demək düzgün olmaz. Burada insan amili mühüm rol oynayır və bu amil həm modelləşdirmə, həm də kəmiyyətcə ifadə baxımından olduqca mürəkkəbdir. Ümumiyyətlə, münaqişələr adətən tək bir səbəblə izah oluna bilmir. Buna görə də iqlim və ətraf mühit faktorlarını sülh və təhlükəsizlik məsələlərini anlamağa çalışarkən daha geniş kontekstdə, yəni çoxsaylı amillərdən biri kimi nəzərdən keçirmək lazımdır. Məhz CSM yanaşması da bu daha nüanslı və kompleks baxışı ortaya qoymağa çalışır", - deyə o qeyd edib.

Bundan başqa, qonaq deyib ki, iqlim dəyişikliyi təhlükəsizlik gündəliyində daha yüksək prioritet kimi qiymətləndirilir: "İqlimlə bağlı təhlükəsizlik riski getdikcə daha çox müzakirə olunan mövzulardan biridir: "İqlim Dəyişikliyi üzrə Hökumətlərarası Panelin (IPCC) 5-ci Qiymətləndirmə Hesabatında da insan təhlükəsizliyi və onun daha geniş təhlükəsizlik anlayışlarına təsiri vurğulanırdı. Lakin bəzi regionlarda bu məsələ daha qabarıq şəkildə özünü göstərir. Burada təhlükəsizliyin "sekuritizasiya" aspekti ön plana çıxır. Yəni iqlim, sülh və təhlükəsizlik məsələsi iqlimi daha yüksək siyasi və strateji səviyyəyə qaldırır; iqlim təsirləri artıq sadəcə ekoloji narahatlıq kimi deyil, daha yüksək prioritet və resurs tələb edən təhlükəsizlik məsələsi kimi qiymətləndirilir. Təbii ki, əsas hədəf emissiyaların azaldılması və problemin kökündən həll edilməsidir. Bununla yanaşı, iqlimə uyğunlaşma istiqamətində, sülh və təhlükəsizliklə birbaşa əlaqəsi olmayan, lakin böyük əhəmiyyət daşıyan geniş bir fəaliyyət sahəsi də mövcuddur. Bu addımların həyata keçirilməsi vacibdir".

Oxşar xəbərlər

BMT: İqlim, sülh və təhlükəsizlik yanaşmaları risklərin idarə olunmasına hazırlığı artırır

BMT: İqlim, sülh və təhlükəsizlik kimi mürəkkəb çağırışlar pərakəndə fəaliyyətdən çoxunu tələb edir

Françesko Korvaro: İqlim və sülh naminə hərəkət etməyin vaxtı çatıb

"COP29 Sülh və İqlim təşəbbüsü" Liderlər Qrupuna daxil olan ölkələrin adları məlum olub

Anaklaudia Rossbax: "Adekvat mənzil anlayışı iqlim risklərini də əhatə etməlidir"