Şəhər səhiyyəsi təşəbbüslərində icmaların iştirakı həlledicidir.

"Sizinxeber.az" xəbər verir ki, bunu "Fast Track Health, IAPAC və Fast-Track Cities İnstitut"un Prezidenti və Baş icraçı direktoru (CEO) Jose Zuniga Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Azərbaycan: Sağlam Evlərin Nəbzi" adlı tədbirdə bildirib.

O, "Sürətli Fəaliyyət Şəhərləri" təşəbbüsü haqqında danışıb: "Bu təşəbbüs 2014-cü ildə, ilkin olaraq 26 şəhərin HİV, vərəm və viruslu hepatitə qarşı cavab tədbirlərini sürətləndirmək öhdəliyi götürməsi ilə başlayıb. Bu gün biz dünyanın hər bir regionunda olmaqla, qlobal miqyasda 600-dən çox şəhəri əhatə edirik. 2024-cü ildə biz fəaliyyət dairəmizi digər yoluxucu xəstəliklərə, qeyri-yoluxucu xəstəliklərə və iqlim dəyişikliyinin sağlamlığa göstərdiyi təsirlərə qədər genişləndirdik. Çünki HİV, vərəm və viruslu hepatit təcrid olunmuş vəziyyətdə mövcud deyil; digər xəstəliklər və iqlim dəyişikliyinin təsirləri də eyni dərəcədə bir-biri ilə bağlıdır. Bu baxımdan, "Sürətli Fəaliyyət Şəhərləri"nin uğurunun sirri davamlı siyasi iradə və öhdəlikləri ehtiva edir. Yəni, seçilmiş rəsmi şəxslərin, şəhər şurasının və eyni dərəcədə vacib olan şəhərdaxili planlaşdırma şuralarının "Sürətli Fəaliyyət Şəhərləri Paris Bəyannaməsi"nin məqsədlərinə ilbəil sadiq qalmasını təmin etmək lazımdır"

Qonaq qeyd edib ki, ikinci vacib məqam icmanın (cəmiyyətin) bu prosesi mənimsəməsidir: "Çox vaxt biz şəhər səhiyyəsi təşəbbüslərinin mandatını yerinə yetirmək üçün yalnız siyasətçilərə arxalanırıq. İcma cəlb olunmadan və prosesə sahib çıxmadan siyasi təyinatlıların və yaxud seçilmiş rəsmi şəxslərin bəyannamələri imzalayarkən vəd etdiklərini reallıqda yerinə yetirmələrini təmin edəcək hesabatlılıq mexanizmi əhəmiyyətsiz qalır. ​Digər bir məqam isə məlumatlara əsaslanan fəaliyyətin vacibliyidir. Əgər biz mövcud boşluqları başa düşməsək, onların harada olduğunu bilməsək, strategiyalar və müdaxilələr hazırlayıb tətbiq etmək, yaxud resursları ehtiyacların daha çox olduğu sahələrə spesifik şəkildə yönəltmək olduqca çətin olar. Bir nümunə gətirim: Paris şəhərində bu təşəbbüs işə salınmazdan əvvəl, uzun müddət idi ki, İctimai Səhiyyə Departamenti profilaktik müdaxilələr üçün vəsaitləri bütün şəhər boyu xərcləyirdi. Əsas hədəf qruplarının faktiki olaraq harada məskunlaşdıqlarını xəritələndirməyə başladıqda, biz anladıq ki, bu resursların prioritetləşdirilməli olduğu konkret dairələr (rayonlar) var. Bu mənada, məlumatları götürmək, onlara əsasən fəaliyyət göstərmək, arxasında resurslar qoymaq və zaman keçdikcə təsirini ölçmək bacarığı Parisə "Sürətli Fəaliyyət Şəhərləri" üçün müəyyən edilmiş göstəricilər üzrə ikirəqəmli faiz bəndi artımına nail olmaq imkanı verdi".

Oxşar xəbərlər

Ekspert: "Mənzil təminatı HİV-lə bağlı ölüm riskini azalda bilər"

WUF13-də Xəzər regionunda iqlimə davamlı şəhərlərin qurulması məsələsi gündəmə gəlib

Azərbaycanda qeydiyyata alınan hepatit xəstələrinin sayı açıqlanıb

WUF13-də Xəzər regionunda iqlimədavamlı şəhərlərə və icmalara dair yüksəksəviyyəli dialoq başlayıb

Anar Quliyev: "Şəhərlər qlobal emissiyaların təxminən 70 %-ini təşkil edir"