Azərbaycanda günəş enerjisi üzrə keçirilən hərracın cari mərhələsi, habelə bu istiqamətdə görüləcək tədbirlər müzakirə edilib.

“Sizinxeber.az” Energetika Nazirliyinə istinadən xəbər verir ki, bu müzakirələr “Bərpa olunan enerji mənbələrindən istifadə sahəsində layihələrin həyata keçirilməsi ilə bağlı əlavə tədbirlər haqqında” Azərbaycan Prezidentinin müvafiq Sərəncamı ilə yaradılmış Komissiyanın növbəti iclasında aparılıb.

İclasda qeyd olunub ki, hərracların səmərəli təşkili “yaşıl enerji” layihələrinə cəlb olunan özəl investisiyaların artırılmasına şərait yaradacaq.

Komissiyanın sədri, energetika naziri Pərviz Şahbazov Azərbaycan Prezidenti İlham Əliyevin tapşırıqlarına uyğun olaraq “yaşıl enerji keçidi” istiqamətində həm qanunvericilik sahəsində, həm də genişmiqyaslı layihələrin icrası üzrə atılan addımların strateji əhəmiyyətini diqqətə çatdırıb.

İclasın gündəliyinə uyğun olaraq Komissiyanın son iclasından ötən dövr ərzində həyata keçirilmiş tədbirlərlə bağlı hesabat təqdim edilib. Hesabatda müxtəlif layihələrin icra vəziyyəti, görülən işlər və əldə olunan nəticələr barədə geniş məlumat verilib.

Dünya Bankının dəstəyi ilə həyata keçirilən bərpa olunan enerji mənbələrinin şəbəkəyə inteqrasiyasının təmin edilməsi məqsədilə ötürücü şəbəkənin gücləndirilməsi (AZURE) layihəsi çərçivəsində görülən işlər barədə məruzə dinlənilib.

İclasda, həmçinin BP şirkəti tərəfindən həyata keçirilən “Şəfəq” Günəş Elektrik Stansiyası layihəsi ilə bağlı görülən işlər diqqətə çatdırılıb. 240 MVt gücündə stansiyanın ölkəmizdə bərpa olunan enerjinin ümumi enerji istehsalında payının artırılmasında mühüm əhəmiyyət kəsb etdiyi və regionda ekoloji təmiz enerjiyə keçid prosesini sürətləndirəcəyi qeyd edilib.

İclasda Energetika, İqtisadiyyat, Maliyyə, Ədliyyə, Fövqəladə Hallar, Ekologiya və Təbii Sərvətlər, Kənd Təsərrüfatı, Rəqəmsal İnkişaf və Nəqliyyat nazirlikləri, Azərbaycan Dövlət Neft Şirkəti (SOCAR), Dövlət Şəhərsalma və Arxitektura Komitəsi, Mərkəzi Bank, Minatəmizləmə Agentliyi, “Azərenerji” ASC, “Azərişıq” ASC və Energetika Nazirliyinin yanındakı Bərpa Olunan Enerji Mənbələri Dövlət Agentliyinin nümayəndələri iştirak edib.

Oxşar xəbərlər

Pərviz Şahbazov: “Bu il 4 yeni bərpa olunan enerji stansiyasının təməli qoyulacaq”

Bərpa olunan enerji mənbələrindən istifadəyə dair Komissiyanın iclası olub

Azərbaycan və ADB enerji sahəsində yeni əməkdaşlıq imkanlarını müzakirə edib

Azərbaycanda bərpa olunan enerji üzrə ilk hərracın qalibi COP29-da elan ediləcək - EKSKLÜZİV