Nazir müavini: "Azərbaycanın SPECA ölkələri ilə ticarət dövriyyəsinin artırılması üçün potensial var"

Azərbaycanın SPECA ölkələri ilə ticarət dövriyyəsinin artırılması üçün geniş potensial var.

"Report" xəbər verir ki, bunu iqtisadiyyat nazirinin müavini Səməd Bəşirli Tacikistanın paytaxtı Düşənbədə keçirilən BMT-nin Mərkəzi Asiya Ölkələrinin İqtisadiyyatları üçün Xüsusi Proqramının (SPECA) Rəhbər Şurasının 19-cu sessiyasının ilk iclasında bildirib.

Onun sözlərinə görə, SPECA üzrə məqsədlərin həyata keçirilməsində əhəmiyyətli irəliləyiş müşahidə olunur: "Proqram ölkələri arasında ticarət dövriyyəsinin davamlı artımı, investisiya mühitinin yaxşılaşdırılması, nəqliyyat, enerji, kənd təsərrüfatı və texnologiya kimi əsas sektorlarda fəal əməkdaşlıq buna misaldır".

Nazir müavini qeyd edib ki, gömrük prosedurlarının sadələşdirilməsi, ticarətin asanlaşdırılması artıma əlverişli imkanlar yaradacaq.

S.Bəşirli deyib ki, Azərbaycanda biznes mühitinin daha da yaxşılaşdırılması və innovativ layihələrin dəstəklənməsi istiqamətində mühüm təşəbbüslər həyata keçirilib: "Bu addımlar regionda biznes fəaliyyətinin genişlənməsinə və investisiyaların artmasına töhfə verir".

Qeyd edək ki, tədbirdə SPECA işçi qruplarının, həmçinin BMT-nin Asiya və Sakit Okean üzrə İqtisadi və Sosial Komissiyasının (UNESCAP) və Avropa üzrə İqtisadi Komissiyasının (UNECE) katibliklərinin Proqramla bağlı hesabatları dinlənilib, müzakirələr aparılıb. Tədbirdə ticarətin rəqəmsallaşdırılması, investisiyalar və digər sahələrdə regional əməkdaşlığı nəzərdə tutan “Düşənbə Bəyannaməsi” qəbul olunub.

Proqramın əhatə etdiyi regionda "yaşıl inkişafa" həsr olunmuş SPECA 2024 İqtisadi Forumunda SPECA-nın hazırkı sədri - Tacikistanın iqtisadi inkişaf və ticarət nazirinin müavini Ahliddin Nuriddinzodanın çıxışında, UNESCAP-ın icraçı katibi Armida Salsiya Alişahbananın və UNECE-nin icraçı katibi Tatyana Molçanın videomüraciətlərində "yaşıl inkişaf" çağırışlarının öhdəsindən gəlmək üçün bölgədə dialoq və birgə təşəbbüslərin vacibliyi önə çəkilib. Bildirilib ki, forum yüksək səviyyəli siyasi dialoq üçün platforma rolunu oynayır.

Qeyd edilib ki, Azərbaycan enerji səmərəliliyinin artırılmasına, bərpa olunan enerji mənbələrinin inkişafına və karbon qazının azaldılmasına yönəlmiş "yaşıl inkişaf strategiyası"nı fəal şəkildə davam etdirir və bu istiqamətdə regional əməkdaşlığın genişləndirilməsində maraqlıdır.

Tədbir sessiyalarla davam edib. Müzakirələrdə vurğulanıb ki, regionda iqlim çağırışları fonunda davamlı iqtisadi artım modellərinə keçid üçün enerji transformasiyası, resursların davamlılığı və innovativ strategiyaların tətbiqi zəruridir.

SPECA Çoxtərəfli Etimad Fondunun Rəhbər Komitəsinin ilk iclasında isə qeyd olunub ki, açılışı COP29 çərçivəsində elan edilmiş Fond iştirakçı dövlətlər arasında inkişaf proqramlarının birgə hazırlanması və həyata keçirilməsi üçün çevik və inklüziv maliyyələşdirmə mexanizmidir. Fond regionda dayanıqlı inkişafa nail olmaq üçün əməkdaşlıq platforması rolunu oynayacaq. Qurum SPECA regionunda iqtisadi əməkdaşlığın təşviqi, davamlı inkişaf və inteqrasiya üçün stimul yaradılmasına xidmət edəcək.

İclasda fondun fəaliyyətinə dair müzakirələr aparılıb.