Ukrayna İsveçdən 16 ədəd "Gripen E" qırıcı təyyarəsi alacaq

Ukrayna və İsveç Kiyev tərəfindən 16 ədəd "Gripen E" qırıcı təyyarəsinin alınması barədə saziş imzalayıblar.

"Report" Ukrayna mediasına istinadən xəbər verir ki, razılaşma ölkə Prezidenti Volodimir Zelenskinin İsveçin müdafiə naziri Pol Yonsonla görüşü çərçivəsində imzalanıb.

Zelenskinin sözlərinə görə, saziş Ukrayna aviasiyasını əhəmiyyətli dərəcədə gücləndirməyə imkan verəcək.

"Razılaşma təyyarələrlə yanaşı müvafiq avadanlıq paketini, texniki yardım və dəstəyi də əhatə edir. Həmçinin Baş nazir Ulf Kristerssonla əvvəlki razılaşmalar çərçivəsində ilk 16 Gripen C/D təyyarəsi artıq 2027-ci ilin əvvəlində Hərbi Hava Qüvvələrimizə veriləcək", - o qeyd edib.

Zelenski və Yonson görüş çərçivəsində ikitərəfli əməkdaşlığın inkişafını, xüsusən "Drone Deal"in (pilotsuz uçuş aparatları üzrə sövdələşmənin) hazırlanmasını ətraflı müzakirə ediblər.