Fransa Senatı 2024-2030-cu illər üçün hərbi planlaşdırma haqqında yenilənmiş qanunu qəbul edib.

"Report" xəbər verir ki, iclasın yayımı parlamentin "Public Senat" telekanalı tərəfindən həyata keçirilib.

Sənədin qəbul edilməsinin lehinə 297 senator səs verib, parlamentin yuxarı palatasının 33 üzvü isə əleyhinə çıxış edib.

Bununla belə, Senat qanun layihəsini 2030-cu ilə qədər hərbi xərclərin 36 milyard avro artırılmasını nəzərdə tutan əsas maddə olmadan təsdiqləyib. Bu, "Respublikaçılar" Partiyasının nümayəndələrinin əlavə maliyyələşdirmənin həcmini 50 milyard avroya qədər artırmağı təklif etməsi ilə əlaqədardır.

Senatorlar arasındakı fikir ayrılıqlarına görə maliyyələşdirmənin həcmini müəyyən edən maddə sənəddən çıxarılıb.

Beləliklə, qanun hələlik yekun olaraq qəbul edilməyib. Bundan sonra baxılması üçün yeddi deputat və yeddi senatordan ibarət uzlaşdırma komissiyası yaradılacaq və sənədin vahid variantı hazırlanacaq.

Oxşar xəbərlər

Fransada hərbi xərclər 3,3 milyard avro artırılacaq

Fransa parlamenti hərbi xərclərin artırılmasını təsdiqləyib

ABŞ Senatı 895 milyard dollarlıq müdafiə büdcəsini təsdiqləyib

ABŞ Senatı büdcə haqqında qanun layihəsini gecikmə ilə qəbul edib

Senat Trampın İrana zərbə endirmək səlahiyyətini məhdudlaşdıran qətnaməni rədd edib