Azərbaycanda tanınmış musiqiçi VƏFAT ETDİ - FOTO

Şəki şəhərinin tanınmış musiqiçisi Taleh Yusubov vəfat edib.

Oxu.Az-ın məlumatına görə o 75 yaşında dünyasını dəyişib.

Belə ki, o "Zirvə" vokal-instrumental ansamblının yaradıcılarından biri və solisti olub.

Adil Kərimli: Yubileyin dövlət səviyyəsində qeyd olunması Azərbaycanın ortaq Türk irsinə verdiyi dəyərin bariz nümunəsidir

Azərbaycan Birinci Türkoloji Qurultayın irsinə hər zaman böyük diqqət və ehtiramla yanaşır. Azərbaycan Respublikasının Prezidenti İlham Əliyevin təşəbbüsü və müvafiq Sərəncamı ilə bu yubiley dövlət səviyyəsində qeyd olunur. Bu, Azərbaycan dövlətinin Türk dünyasının ortaq elmi və mədəni irsinə verdiyi yüksək dəyərin bariz nümunəsidir.

AZƏRTAC xəbər verir ki, bunu mədəniyyət naziri Adil Kərimli iyunun 29-da Heydər Əliyev Mərkəzində Birinci Türkoloji Qurultayın 100 illiyinə həsr olunmuş “Türk Dünyası Həftəsi”nin açılış mərasimində çıxışı zamanı deyib.

"Bu gün biz sadəcə bir yubileyi qeyd etmirik. Biz yüz il əvvəl Bakıda əsası qoyulmuş böyük bir ideyanın-ortaq mədəniyyət və mənəvi birlik ideyasının bir əsrlik tarixini qeyd edirik. İnanıram ki, keçiriləcək görüşlər yeni elmi təfəkkürün, yeni ideyaların və yeni əməkdaşlıq körpülərinin yaranmasına mühüm töhfə verəcək".

Birinci Türkoloji Qurultayın 100 illiyinə həsr olunmuş "Türk Dünyası Həftəsi" keçiriləcək

Azərbaycanda iyunun 29-dan iyulun 3-dək Birinci Türkoloji Qurultayın 100 illiyinə həsr olunmuş "Türk Dünyası Həftəsi" keçiriləcək.

Bu barədə "Sizinxeber.az"a Mədəniyyət Nazirliyindən məlumat verilib.

Bildirilib ki, elm və mədəniyyətlə bağlı silsilə tədbirlərdən ibarət həftə Azərbaycan Respublikasının Prezidenti İlham Əliyevin "Birinci Türkoloji Qurultayın 100 illik yubileyinin keçirilməsi haqqında" 22 oktyabr 2025-ci il tarixli Sərəncamına uyğun olaraq təşkil ediləcək.

"Türk Dünyası Həftəsi" Mədəniyyət Nazirliyi, Azərbaycan Milli Elmlər Akademiyası (AMEA), Elm və Təhsil Nazirliyi birgə təşkilatçılığı, Türk Dövlətləri Təşkilatı, TÜRKSOY, Bakı Dövlət Universiteti, Türk Akademiyası, Türk Mədəniyyəti və İrsi Fondunun tərəfdaşlığı ilə keçiriləcək.

Həftənin əsas tədbiri "Birinci Türkoloji Qurultay: yüz ilin elmi və mədəni irsi" mövzusunda beynəlxalq konqres olacaq. İyunun 29-da Heydər Əliyev Mərkəzində rəsmi açılış mərasimi keçiriləcək konqresdə türk respublikaları daxil olmaqla ümumilikdə 20 ölkənin müxtəlif elmi mərkəzlərindən 80 tanınmış türkoloq-alim, eləcə də türk beynəlxalq təşkilatlarından nümayəndələrin iştirakı nəzərdə tutulur. Açılış mərasimində qurultaya həsr olunmuş interaktiv sərgi və qısametrajlı film təqdim ediləcək.

İyunun 29-da həmçinin Heydər Əliyev Mərkəzində Bakı Dövlət Universitetinin təşkilatçılığı ilə "Türk dilləri, ədəbiyyatları və tarixlərinin tədrisi müasir çağırışlar kontekstində" mövzusunda beynəlxalq konfrans keçiriləcək.

İyunun 30-da AMEA Rəyasət Heyətinin binasında "Türk tarixi hekayələri və ideoloji yanaşmalar" mövzusunda panel müzakirələri təşkil olunacaq. Həmin gün Dənizkənarı Milli Parkda konsert proqramı keçiriləcək.

İyulun 1-də konqres iştirakçıları üçün Qarabağ bölgəsinə səfər təşkil ediləcək. Ağdam, Şuşa və Xankəndi şəhərlərini əhatə edən səfər çərçivəsində iştirakçılar regionun tarixi-mədəni abidələri ilə tanış olacaqlar. Həmin gün Ağdam Muğam Mərkəzində dahi Azərbaycan şair-dramaturqu Hüseyn Cavidin eyniadlı pyesi əsasında "İblis" tamaşası nümayiş etdiriləcək.

İyulun 2-də Qarabağ Universitetində "Birinci Türkoloji Qurultayın mədəni və elmi mirası" mövzusunda panel müzakirəsi keçiriləcək. Müzakirələrin yekununda "Türk Dünyası Həftəsi" çərçivəsində gerçəkləşən plenar və panel sessiyaların nəticələrini əks etdirən, türkologiya sahəsində növbəti yüzillik üçün prioritet istiqamətləri, strateji çağırışları və ortaq əməkdaşlıq perspektivlərini müəyyənləşdirən yekun sənədin qəbul edilməsi nəzərdə tutulur.

Həmin gün eyni zamanda Bakıda Milli Azərbaycan Tarixi Muzeyində yubiley sərgisi, Azərbaycan Milli Kitabxanasında isə Türk Dünyası Milli Kitabxanaları Birliyinin konfransı və yeni nəşrlərin təqdimatı keçiriləcək.

"Türk Dünyası Həftəsi"nin sonuncu günü-iyulun 3-də Azərbaycan Milli İncəsənət Muzeyində "Əli bəy Hüseynzadə: böyük mütəfəkkir və rəssam" mövzusunda elmi seminar və sərgi təşkil olunacaq. Nizami Kino Mərkəzində film nümayişi ilə həftənin bağlanışı olacaq.

"Türk Dünyası Həftəsi" "Azərbaycan Mədəniyyəti – 2040" Konsepsiyasında qeyd edilən qlobal trendlər kontekstində türk xalqlarının ortaq mədəni irsinin öyrənilməsi, qorunması və təbliği baxımından əhəmiyyətli platforma olacaq.

Bakıda Şimali Kiprin Mədəniyyət Günü keçirilir

Bakıda Şimali Kiprin Mədəniyyət Günü təşkil olunub.

"Report" xəbər verir ki, "İçərişəhər" Dövlət Tarix-Memarlıq Qoruğunda təşkil olunan Mədəniyyət Gününün açılışında Şimali Kiprin Baş naziri Ünal Üstel və rəhbərlik etdiyi nümayəndə heyəti, Türkiyənin Azərbaycandakı səfiri Birol Akgün, Şimali Kiprin Azərbaycandakı səfiri Ufuk Turqaner, Milli Məclisin üzvləri və digər rəsmilər iştirak edib.

Açılış nitqi ilə çıxış edən "İçərişəhər" Dövlət Tarix-Memarlıq Qoruğu İdarə Heyətinin sədri Rüfət Mahmud "İçərişəhər"in müxtəlif xalqların mədəniyyətinin və incəsənətinin təqtimatına həmişə uğurla evsahibliyi etdiyini deyib.

O, mədəniyyətin xalqları bir-birinə yaxınlaşdıran körpü olduğunu vurğulayıb.

Şimali Kipr Baş nazirinin müavini Fikri Ataoğlu Azərbaycan-Türkiyə-Şimali Kipr qardaşlığına diqqət çəkərək təşkil olunan Mədəniyyət Gününü bu birliyin təzahürü adlandırıb.

Ü.Üstel isə çıxışında qonaqpərvərlik və təşkilatçılığa görə Azərbaycana təşəkkür edib. O, xalqlar arasındakı mövcud dostluq və qarşılıqlı dəstəyin gələcək illərdə də əməkdaşlığın inkişafına töhfə verəcəyini bildirib.

Çıxışların ardınca Şimali Kiprin milli-mədəni irsi, incəsənəti, musiqisi, rəqsləri, mətbəxi və turizm potensialını nümayiş etdirən stendlər təqdim olunub.

Nine Senses Fest 2026-da ilk dəfə sağlam həyat tərzi üzrə tibbi panel keçiriləcək

Üçüncü Beynəlxalq Nine Senses Fest 2026 festivalı (12-14 iyun) çərçivəsində xəstəliklərin profilaktikası və sağlamlığın qorunması məsələlərinə həsr olunmuş xüsusi tibbi panel təşkil ediləcək.

"Report" xəbər verir ki, bu barədə Nine Senses Art Center-in direktoru Natalya Jukova bugün keçirilən mətbuat konfransında bəyan edib.

Azərbaycan və Türkmənistan arasında mədəni əlaqələrin perspektivi müzakirə edilib

Azərbaycan və Türkmənistan mədəniyyət nazirlərinin müavinləri iki ölkə arasındakı mədəni əlaqələrin perspektivini müzakirə ediblər.

"Report"un Türkmənistana ezam olunan əməkdaşı xəbər verir ki, nazir müavinləri Murad Hüseynov və Nursahed Şirimov iki ölkə arasındakı qardaşlıq münasibətinin bütün sahələrdə olduğu kimo mədəniyyət sahəsində də inkişafının vacibliyini qeyd ediblər.

Görüşdə Azərbaycan və türkmən xalqlarının qədim və zəngin mədəni yaxınlığı konteksində əməkdaşlığın daha da dərinləşdirilməsinin əhəmiyyəti vurğulanıb.

Nazir müavinləri xalqlar arasındakı qardaşlıq münasibətləri baxımından qarşılıqlı mədəniyyət günlərinin təşkilinin vacibliyinə də diqqət çəkiblər.

Azərbaycanlı rəssam beynəlxalq sərginin qalibi olub

Azərbaycanlı rəssam Raminə Səadətxan Kiprin Limassol şəhərində keçirilən "VIMA 2026" beynəlxalq incəsənət sərgisində Latviya qalereyası tərəfindən təqdim olunan solo stendlə iştirak edərək böyük uğura imza atıb.

"Report" xəbər verir ki, rəssam sərgidə təqdim etdiyi əsərlərlə ziyarətçilərin xüsusi diqqətini cəlb edib və keçirilən səsvermənin nəticələrinə əsasən "Audience Choice" mükafatına layiq görülərək birinci yerə çıxıb.

Ramina Saadatkhanın fərdi ekspozisiyası insanın daxili dünyası, emosional transformasiya və intuitiv hisslər mövzularını əhatə edən əsərlərlə beynəlxalq auditoriyada böyük maraq doğurub. Onun rəng və forma üzərində qurduğu özünəməxsus vizual dili sərginin ən çox müzakirə olunan təqdimatlarından biri kimi qiymətləndirilib.

"VIMA 2026" çərçivəsində əldə olunan bu uğur Azərbaycan müasir incəsənətinin beynəlxalq platformalarda daha geniş tanınması baxımından mühüm hadisə hesab olunur.

VI "Qızıl Şah" Milli Kulinariya Çempionatı yekunlaşıb, qaliblər müəyyənləşib

31-ci Beynəlxalq Qida Sənayesi Sərgisi ("InterFood Azerbaijan") çərçivəsində keçirilən "Qızıl Şah" Milli Kulinariya Çempionatının qalibləri bəlli olub.

"Sizinxeber.az" xəbər verir ki, çempionatın yekun nəticələrinə əsasən, "Ən yaxşı gənclər komandası" nominasiyası üzrə Serbiya təmsilçiləri birinci yerə layiq görülüblər. "Chefleen" komandası ikinci, "CÀSÀ" komandası isə üçüncü yeri tutub.

"Ən yaxşı peşəkar komanda" nominasiyasında "Hyatt Hotel" komandası birinci olub. "Chefleen" ikinci, "Novikov Group" isə üçüncü yerlə mükafatlandırılıb.

Fərdi kateqoriyalar üzrə "Gənclər arasında ən yaxşı ət yeməyi" nominasiyasında İbrahim Rəhimov, "Gənclər arasında ən yaxşı quş əti yeməyi" nominasiyasında Nail Bayramov və Rəhim Mustafayev, "Gənclər arasında ən yaxşı dəniz məhsulları yeməyi" nominasiyasında isə İnarə Səmədova fərqləniblər.

"Ən yaxşı milli komanda" nominasiyası üzrə Azərbaycan komandası birinci yerə layiq görülüb. Xorvatiya ikinci, "Kazakhstan Chefs Hub" komandası isə üçüncü yeri tutub.

Çempionatın əsas mükafatı olan "İlin qızıl aşpazı" adına Belarus təmsilçisi Voyçanka Katsiarina layiq görülüb.

Qeyd edək ki, Dövlət Turizm Agentliyi və Azərbaycan Milli Kulinariya Mərkəzinin dəstəyi, Ümumdünya Usta Aşpazlar Cəmiyyətləri Assosiasiyasının ("Wordlchefs") tərəfdaşlığı ilə Azərbaycan Kulinariya Mütəxəssisləri Assosiasiyası (ACSA) tərəfindən təşkil olunan çempionatda Türkiyə, Qazaxıstan, Özbəkistan, Pakistan, Ukrayna, Serbiya, Rusiya, Belarus, Xorvatiya və Rumıniyadan komandalar iştirak edib.

Builki çempionatın proqramına fərdi aşpaz kateqoriyaları, şirniyyatçılıq sənəti, komanda yarışları və gənclər (junior) kateqoriyaları daxil edilib, innovasiyalara, davamlı inkişafa və milli kulinariya ənənələrinin müasir beynəlxalq tendensiyalarla vəhdətinə xüsusi diqqət yetirilib.

6-cı "Qızıl Şah" Milli Kulinariya Çempionatının münsiflər heyəti ABŞ, Böyük Britaniya, İsveç, İtaliya, Almaniya və digər ölkələrdən olan, "Worldchefs" tərəfindən lisenziyalaşdırılmış beynəlxalq hakim-aşpazlar olublar.

Xatırladaq ki, 2019-cu ildən keçirilən çempionatda yerli və əcnəbi aşpazlar fərdi, həmçinin komanda şəklində müxtəlif yarış kateqoriyalarında iştirak edirlər. "Qızıl Şah" Milli Kulinariya Çempionatı 2024-cü ildən etibarən "Wordlchefs" ilə birgə təşkil edilən "Gold Shah" kontinental (qitə) aşpazlar çempionatına ev sahibliyi etmək hüququnu əldə edib. "Wordlchefs" tərəfindən rəsmi olaraq tanınan ilk yerli çempionat kimi "Qızıl Şah" Milli Kulinariya Çempionatı digər ölkələrin də komandalarını qəbul etmək imkanı qazanıb. Bundan əlavə, beynəlxalq tanınma nəticəsində müsabiqənin qaydaları təkmilləşdirilərək daha yüksək səviyyəli hakimlər münsiflər heyətinə cəlb edilib.

"Qızıl Şah" çempionatı kulinariya sahəsində yeni istedadların üzə çıxarılması, təcrübə mübadiləsi və Azərbaycanın qastronomiya mədəniyyətinin beynəlxalq səviyyədə tanıdılması üçün mühüm platforma olaraq inkişafını davam etdirir.

Polad Bülbüloğlu: Heydər Əliyev həmişə Azərbaycanın gənc mədəniyyət xadimlərini dəstəkləyirdi

Ümummilli Lider Heydər Əliyev Azərbaycanın gənc istedadlarına böyük diqqət yetirirdi və yaradıcı ziyalıların nümayəndələrinə dəstək göstərirdi.

"Sizinxeber.az" xəbər verir ki, bu barədə Milli Məclisin Mədəniyyət komitəsinin sədri Polad Bülbüloğlu Heydər Əliyevin anadan olmasının 103-cü ildönümünə həsr olunmuş gecədə bildirib.

O qeyd edib ki, bu dəstəyin sayəsində 70-ci illərdə respublikada əsl mədəni yüksəliş baş verib.

"Heydər Əliyevin dövründə 10 il mədəniyyət naziri kimi işləmiş, sovet vaxtında isə onun himayəsindən bəhrələnmiş bir şəxs kimi deyə bilərəm ki, 70-ci illərdə ortaya çıxan bütün mədəniyyət xadimləri nəsli həmişə onun diqqətini, köməyini və dəstəyini hiss edirdi", - Bülbüloğlu deyib.

O vurğulayıb ki, sərt sovet ideologiyası şəraitində Heydər Əliyev yaradıcı insanlara özlərini sərbəst ifadə etməyə imkan verib. Bununla əlaqədar, Bülbüloğlu Moskvada Sov.İKP Mərkəzi Komitəsinin şöbə müdiri Vasili Şauranın iştirakı ilə baş tutan söhbətin epizodunu xatırladıb; o, SSRİ-nin digər respublikalarında olduğu kimi, Azərbaycanda niyə dissidentlərin aşkar edilmədiyi ilə maraqlanmışdı.

"Heydər Əliyev bir qədər fikirləşdi və sakitcə cavab verdi: "Biz onları axtarmırıq", - Bülbüloğlu danışıb və bunu ulu öndərin ziyalılara münasibətdə prinsipial mövqeyinin təzahürü adlandırıb.

O qeyd edib ki, məhz həmin dövrdə Azərbaycan "istedadlar bumu" və əsl mədəniyyət çiçəklənməsi yaşayırdı.

Parlamentari xüsusi olaraq Heydər Əliyevin müstəqil Azərbaycan tarixindəki rolunu vurğulayıb. O xatırladıb ki, 1993-cü ildə ölkə ən ağır vəziyyətdə - dağılmış iqtisadiyyat, ərazilərin itirilməsi və sabitliyin pozulduğu şəraitdə idi, lakin Heydər Əliyev dövləti böhrandan çıxarmağı və cəmiyyətə gələcəyə inamı qaytarmağı bacardı.

Qeyd edək ki, Azərbaycanın Rus İcması ulu öndər Heydər Əliyevin anadan olmasının 103-cü ildönümünə həsr olunmuş gecə təşkil edib. Tədbir çərçivəsində müəllifi rusiyalı jurnalist Mixail Qusman olan "Liderin ürəyi" sənədli filminin nümayişi baş tutub.

Qaxda Kürmükoba bayramı qeyd edilib

Qax rayonunda ənənəvi Kürmükoba bayramı keçirilib.

"Report"un Şimal-qərb bürosunun məlumatına görə, ildə iki dəfə keçirilən bayramı qeyd etmək üçün yüzlərlə müsəlman və xristian rayondakı Kürmük məbədini ziyarət edib.

Qədim mərasim ayini olan "Kürmükoba" bayramına ətraf bölgələrdən də çox sayda ziyarətçi qatılıb. Tarixi yaddaşa söykənən iştirakçılar Kürmükoba bayramında Aya, Günəşə, təbiətə sitayişin izlərini daşıyan qədim ayinləri icra edir, ağaclara yaylıq və dəsmallar bağlayır, qaya daşlarının üstündə şamlar yandıraraq niyyət edir, məbəd həyətində mütləq xoruz və ya toyuq, hətta qoyun kəsirlər.

Hazırda Kürmükoba mərasiminə xristian və İslam dini elementləri daxil edilsə də, bu bayramda qədim inancların qalıqları, təbiət ayinləri özünü daha çox büruzə verir.

Mərasimin may və noyabr aylarında - yəni çayın daşma mövsümündə keçirilməsi isə Kürmük məbədinin, həmçinin Kürmükoba mərasiminin öz adını bölgənin həyat mənbəyi sayılan bol sulu Kürmük çayından götürdüyünü söyləməyə əsas verir.