Sizinxeber.az – Azərbaycan Xəbərləri

Azərbaycanda aktrisa ilə teatr direktoru arasında məhkəmə çəkişməsi

Azərbaycanda aktrisa ilə teatr direktoru arasında məhkəmə çəkişməsi
22 dəfə Baxılıb
23 Sentyabr 2019 - 23:03

Azərbaycanda aktrisa ilə teatr direktoru arasında məhkəmə çəkişməsi
Nəsimi Rayon Məhkəməsində İrəvan Dövlət Azərbaycan Dram Teatrının aktrisası Şəbnəm Cəbrayılovanın həmin teatrın direktoru İftixar Piriyevə qarşı iddiası əsasında məhkəmə iclası başlayıb.

Ş.Cəbrayılovanın vəkili Gülşən Salmanova Oxu.Az-a bildirib ki, hakim Rəşid Səmədovun sədrliyi ilə keçirilən prosesdə İ.Piriyev vəsatət qaldırıb.

Teatrın direktoru deyib ki, Ş.Cəbrayılovanın iddiasına aidiyyəti üzrə Nəsimi Rayon Məhkəməsində deyil, Binəqədi Rayon Məhkəməsində baxılmalıdır.

Məhkəmə vəsatəti təmin etməyib.

Həmin qərardan narazı qalan İ.Piriyev apellyasiya şikayəti verib. İşə Bakı Apellyasiya Məhkəməsində baxılacaq.

Qeyd edək ki, İrəvan Dövlət Azərbaycan Dram Teatrının aktrisası Ş.Cəbrayılova həmin teatrın direktoru İ.Piriyevi məhkəməyə verib.

Vəkil G.Salmanova qeyd edib ki, bu il avqust ayında Ş.Cəbrayılova hamilə olan zaman İrəvan Dövlət Azərbaycan Dram Teatrının direktoru İ.Piriyev onu işdən azad edib: “Şəbnəm xanım hamilə olan zaman bu barədə teatrın direktoru İftixar Piriyevə məlumat verib. Lakin İftixar Piriyev Şəbnəm Cəbrayılovanı hamilə olan zaman, ona əvvəlcədən məlumat vermədən işdən çıxarıb. Daha sonra teatrdan ona işdən çıxarıldığı deyiləndə Şəbnəm xanımın halı pisləşib və uşağı tələf olub. Lakin bu hal qanunvericilikdə yolverilməzdir”.

Bununla bağlı Nəsimi Rayon Məhkəməsinə müraciət edilib.

Ş.Cəbrayılova məhkəməyə müraciətində yenidən işə bərpa olunmasını, İ.Piriyevdən ona dəyən maddi və mənəvi zərərə görə 50 min manat təzminat tələb edir.

Qeyd edək ki, Ş.Cəbrayılova 2014-cü ildə İrəvan Dövlət Azərbaycan Dram Teatrında aktrisa kimi fəaliyyətə başlayıb. İ.Piriyev isə 2000-ci ildən İrəvan Dövlət Azərbaycan Dram Teatrında direktor vəzifəsində çalışır.

© Sizinxeber.az, 2016—2019Məlumatdan istifadə etdikdə istinad mütləqdir. (055) 501-17-11, [email protected]