Sizinxeber.az – Azərbaycan Xəbərləri

“Piter Elçin”in qardaşının qatili apellyasiya məhkəməsində

“Piter Elçin”in qardaşının qatili apellyasiya məhkəməsində
8 dəfə Baxılıb
24 Avqust 2018 - 16:44

Şirvan Apellyasiya Məhkəməsində Lənkəran şəhər sakini Murad Quluzadənin (1993-cü il təv.) CM-nin 120.1-ci (qəsdən adam öldürmə) və 228.1-ci (qanunsuz olaraq odlu silahı əldə etmə, saxlama, gəzdirmə və ya satma) maddələri ilə məhkum olunmasına dair məhkəmə prosesi keçirilib.

Oxu.Az-ın məlumatına görə, ittiham aktına əsasən, 2012-ci il sentyabrın 26-da Moskva şəhərində Murad Quluzadənin əmisi oğlu Amil Quliyev“Rövşən Lənkəranski”nin yaxın adamı tərəfindən qətlə yetirilib.

Quluzadə əmisi oğlunun ölümündə Lənkəran rayonunun Boladi kənd sakini Fariz İsmayılovun (1979-cu il təv.) iştirakı olduğunu güman edib və qisas məqsədilə onu qəsdən öldürmək qərarına gəlib.

Dörd ildən sonra, yəni 2016-ci il dekabrın 21-də Fariz İsmayılov idarə etdiyi “Volksvagen” markalı avtomaşınla Masallı rayonunun Türkoba kəndində yerləşən marketlərdən birinə gəlib.

Oradan çıxanda əvvəlcədən izləyən Murad “UZİ” markalı tapança-pulemyotdan ona 24 dəfə atəş açıb. Fariz aldığı xəsarətdən hadisə yerində keçinib. Cinayəti törədən Quluzadə könüllü Masallı RPŞ-nə gələrək, təslim olub və silahı polis əməkdaşlarına təqdim edib.

Fakta görə rayon Prokurorluğunda CM-nin 120.2.4-cü (xüsusi amansızlıqla qəsdən adam öldürmə) və 228.1-ci (qanunsuz olaraq odlu silahı əldə etmə, satma və ya gəzdirmə) maddələri ilə cinayət işi başlanılıb.

Lənkəran Ağır Cinayətlər Məhkəməsi CM-nin 120.2.4-cü maddəsini 120.1-ci maddəsinə tövsif edib və təqsirləndirilən şəxsə 14 il azadlıqdan məhrumetmə cəzası təyin edib.

Hökmdən narazı qalan prokuror apellyasiya protesti, məhkum isə apellyasiya şikayəti verib. Şirvan Apellyasiya Məhkəməsi hökmü dəyişdirilmədən saxlayıb.

Dövlət ittihamçısı Ali Məhkəməyə kassasiya protesti, zərərçəkmiş şəxsin hüquqi varisi və məhkum apellyasiya şikayətləri veriblər.

Ali Məhkəmə prokurorun protestini təmin edib. Qərara əsasən, Şirvan Apellyasiya Məhkəməsinin qərarı ləğv edilib və iş yeni apellyasiya baxışına göndərilib. Şirvan Apellyasiya Məhkəməsində növbəti proses sentyabrın 20-nə təyin edilib.

Qeyd edək ki,  Fariz İsmayılov “Piter Elçin” ləqəbi ilə tanınan Elçin İsmayılovun iki qardaşından biri olub. Bu hadisədən əvvəl onun digər qardaşı da öldürülüb.

“Piter Elçin” və “Rövşən Lənkəranski” arasında əvvəllər yaxın dostluq münasibətləri olub. Lakin sonuncunun yaxın adamı olan Amil Quliyevin (Amil Lənkəranskinin) qətlindən sonra onlar düşmən olublar.

© Sizinxeber.az, 2016—2019Məlumatdan istifadə etdikdə istinad mütləqdir. (055) 501-17-11, [email protected]