22 
Eyl
2023
18:07

Hər zaman Azərbaycanın yanında olacağıq - Türkiyə milli müdafiə naziri

22 Eyl, 2023
18:07
0

Hər zaman Azərbaycanın yanında olacağıq - Türkiyə milli müdafiə naziri

Azərbaycan və Türkiyə arasında imzalanan Şuşa Bəyannaməsi var.

Trend xəbər verir ki, bunu Türkiyənin milli müdafiə naziri Yaşar Gülər “Milliyət”ə müsahibəsində deyib.

"Biz hər zaman azərbaycanlı qardaşlarımızın yanında olacağıq. Bunu hər zaman deyirik. Əslində, Azərbaycan Qarabağ lokal antiterror tədbirlərinə başlayanda Türkiyə Prezidenti Rəcəb Tayyib Ərdoğan Azərbaycana hərtərəfli dəstəyimizi açıq şəkildə nümayiş etdirdi. Qardaşlarımıza da bildirdik ki, onlara dəstək olacağıq", - deyə Y.Gülər əlavə edib.

Qeyd edək ki, Azərbaycan Ordusunun Qarabağda başlatdığı lokal xarakterli antiterror tədbirləri separatçıların təslim olması ilə nəticələnib. Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq, tam atəşkəs haqqında razılaşma əldə olunub və 2023-cü il sentyabrın 20-də saat 13:00-da lokal xarakterli antiterror tədbirləri dayandırılıb.

Əldə edilən razılaşmaya əsasən, Azərbaycan Respublikasının Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoyur, döyüş mövqelərindən və hərbi postlardan çıxır və tam şəkildə tərksilah olunurlar. Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır.

Paralel şəkildə bütün silah-sursat və ağır texnika təhvil verilir.

Yuxarıda qeyd olunan proseslərin Rusiya sülhməramlı kontingenti ilə əlaqələndirilmiş şəkildə həyata keçirilməsi təmin edilir.

Azərbaycan Respublikası Prezidentinin Administrasiyasının təklif etdiyi kimi, Qarabağın erməni sakinlərinin nümayəndələri ilə 2023-cü il sentyabrın 21-də Yevlaxda görüş keçirilib. Görüş zamanı erməni tərəfi bağça və məktəblərin istilik sistemləri, təcili tibbi yardım və yanğınsöndürmə xidmətlərinin ehtiyacları təmin olunmaqla yanacağın təchiz edilməsi və humanitar dəstəyin həyata keçirilməsi istəyib.

Bizimlə əlaqə saxlayın